Ադրբեջանը հուշագիր է ստորագրել Իրանի հետ Նախիջևան հաղորդակցության մասին
ՀԱՍԱՐԱԿՈՒԹՅՈՒՆ
rossaprimavera.ru-ն գրում է, որ մարտի 11-ին Ադրբեջանի և Իրանի իշխանությունների կողմից ստորագրվել է փոխըմբռնման հուշագիր Իրանի տարածքով Ադրբեջանի Արևելյան Զանգեզուրի տնտեսական շրջանի և Նախիջևանի Ինքնավար Հանրապետության միջև նոր կապուղիներ ստեղծելու վերաբերյալ։ Այս մասին հայտնել է Ադրբեջանի նախագահի աշխատակազմի վարչության պետ Հիկմեդ Հաջիևը։ Ըստ նրա 44-օրյա պատերազմի ընթացքում Ադրբեջանի վերահսկողության տակ անցած տարածքներում՝ Զանգիլանի շրջանի Աղբենդ գյուղում Արաքս գետի վրայով դեպի Իրան կամուրջներ են կառուցվելու։ «Հիմք է դրվել նոր նախագծի, որը ներառելու է ճանապարհները, երկաթուղիները և էլեկտրահաղորդման գծերը: Դա կլինի Թուրքիան, Իրանն ու Ադրբեջանը կապող միջանցք։ Այն կդառնա նաև նոր միջանցք Եվրասիայում, որը կփոխի ողջ տրանսպորտային լանդշաֆտը։ Բնականաբար, մեր երկրները դրանից կշահեն»,- ասել է Հաջիևը։
Նրա խոսքով, պարտվող մնացել է մեկ երկիր. «Ո՞վ չհաղթեց. Հայաստանը: Այսինքն քանի որ Հայաստանը չի ուզում, ուրեմն չենք էլ սպասի։ Ադրբեջանը կշարունակի հավատարիմ մնալ այս դրական օրակարգին»,- ասել է Ադրբեջանի ղեկավարի օգնականը։ Նա պատմական իրադարձություն է անվանել փոխըմբռնման հուշագրի ստորագրումը Իրանի տարածքով հաղորդակցական նոր կապերի ստեղծման վերաբերյալ։
Նյութը հրապարակման պատրաստեց Կամո Խաչիկյանը
