Հայաստանի իրավապահ համակարգում քաոս է տիրում

Հայաստանի իրավապահ համակարգում իսկական քաոս է տիրում։ Առնվազն չորս գերատեսչություններ լուրջ խնդիրներ ունեն գործընկերների հետ և չեն կարողանում սինխրոնիզացնել և համադրել իրար գործողությունները, արդյունքում ստացվում է իսկական շիլաշփոթ։ Նախօրեին, նախագահի երդմնակալության արարողության ժամանակ գլխավոր դատախազ Արթուր Դավթյանը հայտարարեց, թե իրենց համար էլ անակնկալ է եղել նախկին վարչապետ Հովիկ Աբրահամյանի տունը կալանքից հանելու և վաճառքի գործարք իրականացնելու հանգամանքը։ Դիտարկմանը, թե Հակակոռուպցիոն կոմիտեի քննիչն է որոշումը կայացրել, որից հետո հապշտապ վաճառվել է տունը, Արթուր Դավթյանը պատասխանել է, թե իրենք հետաքննելու են և պատասխանատվության ենթարկեն բոլոր մեղավորներին։

Հակակոռուպցիոն կոմիտեի և դատախազության ջրերը տևական ժամանակ մի առվով չեն հոսում։ Պարբերաբար հաղորդագրություններ են տարածում և իրար մեղադրանքներ հասցեագրում։ Բացառություն չէր նաև այս դեպքը։ Հակակոռուպցիոն կոմիտեն նախօրեին զայրալից մի հաղորդագրություն տարածեց, ընդհուպ ծաղրեց և վիրավորական արտահայտություններ թույլ տվեց Գլխավոր դատախազության հասցեին։

«Հակակոռուպցիոն կոմիտեն գործում է միայն օրենքով իրեն վերապահված լիազորությունների շրջանակներում, իսկ օրենքից տեղյակ կամ անտեղյակ սուբյեկտների անհիմն, ականջահաճո արտահայտությունները չեն կարող ազդեցություն ունենալ օրինականության սկզբունքին անշեղ հետևելու կոմիտեի կամքի վրա և ստվերել նրա գործունեությունը», - նշել էր կառույցը:

Երեկ էլ ևս մեկ այլ իրադարձություն էր տեղի ունեցել։ Բարձրագույն դատական խորհուրդը մերժել է Արդարադատության նախարար Կարեն Անդրեասյանի ներկայացրած միջնորդությունը՝ Վերաքննիչ քրեական դատարանի դատավոր Ռուբեն Ռշտունուն կարգապահական պատասխանատվության ենթարկելու վերաբերյալ։ Որոշումից ժամեր առաջ Արդարադատության նախարարը նեղսրտած բողոքել էր Բարձրագույն դատական խորհրդից, հայտնել, որ իրենց ներկայացրած 19 միջնորդություններից միայն 5-ն են բավարարվել։

Ժամանակին բազմիցս նշել ենք, որ այս երկու կառույցների հակակրանքն ու իրար դեմ «բոչկա» գլորելը հասել է ընդհուպ մինչև Նիկոլ Փաշինյանին, և վերջինս խիստ նախազգուշացում է արել երկուսին էլ։ Ըստ երևույթին Գագիկ Ջահանգիրյանի վրա չի ազդել այդ խիստ դիտողությունը, նա վարվում է այնպես, ինչպես խելքը փչի։ Ըստ երևույթին մենք առաջիկայում կտեսնենք նոր փոխհրաձգություններ, թե՛ հակակոռուպցիոն կոմիտեի ու դատախազության միջև, թե՛ Բարձրագույն դատական խորհրդի և Արդարադատության նախարարության միջև։

Վարդան Գաբրիելյան