Ես կասկած չունեմ, որ լուծում կգտնվի. Լավրովը՝ Ուկրաինայում ստեղծված իրավիճակի մասին

Ռուսաստանի արտաքին գործերի նախարար Սերգեյ Լավրովը հայտարարել է, որ Ռուսաստանի Դաշնության և Ուկրաինայի ներկայացուցիչների միջև բանակցությունները տեղի կունենան մարտի 3-ին։

ՌԴ ԱԳ նախարարը վստահ է, որ Ուկրաինայում ստեղծված իրավիճակի լուծումը կգտնվի։

«Իհարկե, լուծում կգտնվի, ես կասկած չունեմ։ Այն պայմանները, որոնք մեզ համար նվազագույնն են, հայտնի են։ Դրանք քննարկվել են ուկրաինական կողմի հետ բանակցություններում Գոմելում, կքննարկվեն նաև այսօր»,- ՏԱՍՍ-ի հաղորդմամբ՝ այս մասին ասել է Լավրովը հինգշաբթի ռուսական եւ արտասահմանյան լրատվամիջոցներին տված հարցազրույցում։