Walt Disney-ը դադարեցնում է իր ֆիլմերի ցուցադրությունը ՌԴ-ում

Ամերիկյան Walt Disney ընկերությունը դուրս է գալիս ռուսական շուկայից և դադարեցնում իր ֆիլմերի ցուցադրությունը Ռուսաստանում՝ հաջակցություն Ուկրաինայի, ինչի մասին ասվում է ընկերության տարածած մամուլի հաղորդագրությունում։ 

«Disney ընկերությունը դադարեցնում է իր ֆիլմերի ցուցադրությունը Ռուսաստանի կինոթատրոններում»,-նշված է ընկերության մամուլի հաղորդագրության մեջ։ 

Ընկերությունը, սակայն, նշել է, որ հնարավոր է՝ հետագայում վերանայի այդ որոշումը՝ կախված իրավիճակից։ Disney-ից նաև նշել են, որ հաշվի առնելով պատերազմի պատճառով առաջացած միգրանտների ճգնաժամի մասշտաբները՝ ընկերությունն աշխատում է հասարակական կազմակերպությունների հետ՝ փախստականներին օգնելու համար:

Հիշեցնենք, որ փետրվարի 24-ի առավոտյան ՌԴ նախագահ Վլադիմիր Պուտինը հայտարարել էր Ուկրաինայի ապառազմականացման համար հատուկ ռազմական գործողություն սկսելու մասին։ 

Հեռուստաուղերձում նա ասել էր, որ հանգամանքները «մեզնից պահանջում են վճռական և անհապաղ գործողություններ, Դոնբասի ժողովրդական հանրապետությունները օգնության խնդրանքով դիմել են Ռուսաստանին»։

Ռուսաստանի ղեկավարի խոսքով, արյունահեղության ողջ պատասխանատվությունը կլինի Ուկրաինայում իշխող ռեժիմի խղճի վրա։ Նա ուկրաինացի զինվորականներին կոչ է արել չկատարել ուկրաինական իշխանությունների հանցավոր հրամանները, վայր դնել զենքերն ու գնալ տուն։