ժողովրդավարության առումով Հայաստանն ունի արձանագրած լուրջ հաջողություններ
ՔԱՂԱՔԱԿԱՆՈՒԹՅՈՒՆ
Վարչապետ Նիկոլ Փաշինյանը երեկ խորհրդարանում հայտարարեց, որ Հայաստանի բրենդը ժողովրդավարությունն է:
Այս թեմայի մասին զրուցել ենք միջազգային իրավունքի մասնագետ Արա Ղազարյանի հետ։
Հարցին, թե ինչ կարծիք ունի այս հայտարարության մասին` իրավագետն ասաց․ «Այո՛, իսկապես, ժողովրդավարության առումով Հայաստանն ունի արձանագրած լուրջ հաջողություններ: Բայց հիմնական զարգացումները, իմ դիտարկումներով, սկսեցին 2008-ի մարտի 1-ի իրադարձություններից հետո՝ 2009-2010 թվականներին և պայմանավորված էին հենց այդ դեպքերով: Բոլոր միջազգային փաստաթղթերում գրված է՝ ազատ խոսքը ժողովրդավարության հիմնաքարն է, իսկ մենք ազատ խոսքի բնագավառում, ցավոք, հետընթաց ունենք՝ կապված զրպարտության, վիրավորանքի քրեականացման, անանուն աղբյուրների բացարձակ արգելքի հետ և այլն: Գուցե մենք ցանկանում ենք, որ ժողովրդավարությունը բրենդային լինի, բայց ժողովրդավարություն ասելով հասկանում ենք երեք բան՝ ժողովրդավարական կառավարում, օրենքի գերակայություն և մարդու իրավունքներ: Եթե մենք ազատ խոսքի բնագավառում արդեն իսկ միջազգային մարմինների կողմից ունենք արձանագրված հետընթաց, ուստի մնում է շտկել սխալներն ու առաջ անցնել»:
