Հայաստանում կտեղադրվի Քրիստոսի աշխարհի ամենաբարձր արձանը
ՀԱՍԱՐԱԿՈՒԹՅՈՒՆ
nsn.fm–ը գրում է, որ Հայաստանում կհայտնվի Հիսուս Քրիստոսի աշխարհի ամենաբարձր արձանը: Նախագիծը նախաձեռնել է ձեռներեց, «Բարգավաճ Հայաստան» կուսակցության նախագահ Գագիկ Ծառուկյանը։ Նրա խոսքով բլուրներից մեկի վրա հուշարձան կանգնեցնելու նախագծի համար մրցույթ է հայտարարվել։ Հիմնական պայմանը, ըստ Ծառուկյանի, այն է, որ արձանի բարձրությունը լինի 33 մետր՝ ըստ Հիսուս Քրիստոսի ապրած տարիների։ «Մեր հայրենիքը ամենադժվար ժամանակներն է ապրում, բայց հայերը, ովքեր առաջինն են ընդունել քրիստոնեությունը, միշտ էլ դժվարությունները հաղթահարել են հավատքով։ Թող դա ցույց տա հայ ժողովրդին վերածննդի ու լույսի ճանապարհը»,- ֆեյսբուքյան իր էջում երեք րոպեանոց տեսանյութում նշել է ձեռնարկատերը։
Այս պահին հայտնի չէ, թե երբ կսկսվի այդ նախագծի իրականացումը և Հայաստանի որ գագաթնակետին կտեղադրվի արձանը։ Ներկայումս Հիսուս Քրիստոսի ամենաբարձր արձանը բրազիլական Ռիո դե Ժանեյրոյում գտնվող Կորկովադո լեռան գագաթի հուշարձան է, որի բարձրությունը, առանց պատվանդանի, 30 մետր է։
Նյութը հրապարակման պատրաստեց Կամո Խաչիկյանը
