Ադրբեջանն ապաշրջափակում ասելով՝ գերազանցապես առաջնահերթություն է համարում «միջանցքի» հարցը
ՔԱՂԱՔԱԿԱՆՈՒԹՅՈՒՆ
Հայաստանի Հանրապետության վարչապետը Վրաստանում խոսեց տարածաշրջանային կոմունիկացիաների ապաշրջափակումից։
Այս թեմայի շուրջ զրուցել ենք ադրբեջանագետ Տաթևիկ Հայրապետյանի հետ։
Հարցին, թե Ադրբեջանում տարածաշրջանում կոմունիկացիաների ապաշրջափակման հարցի վերաբերյալ ի՞նչ դիրքորոշում ունեն` ադրբեջանագետն ասաց. « Ադրբեջանն ապաշրջափակում ասելով՝ գերազանցապես առաջնահերթություն է համարում «միջանցքի» հարցը: Պետության ղեկավարի մակարդակով և քարոզչական բոլոր հնարավոր միջոցներով այդ թեզն են շարունակաբար շրջանառում. Ալիևն իր նախորդ ելույթներում նշել էր, որ պայմանավորվածություն կա, որ այդ ճանապարհի մեծ մասը հենց Հայաստանի կողմից կկառուցվի, այսինքն՝ նրանք ապաշրջափակման հիմքում դնում են Թուրքիայի հետ ցամաքային կարճ կապը ու փորձում են դա ներկայացնել ոչ թե ճանապարհ, այլ՝ «միջանցք»»։
Անդրադառնալով այն հարցին, թե Ադրբեջանը «միջանցք» ասելով ի՞նչ է հասկանում, որ ճանապարհի այն հատվածը, որով կապահովվի իր ու Թուրքիայի ցամաքային կարճ կապը, պետք է վերահսկվի ռուսակա՞ն ու ոչ թե հայկակա՞ն զորքերի կողմից ադրբեջանագետն ասաց. «Իրենք դա հասկանում են էքստերիտորիալ տարածք ու պատահական չէր, որ ՆԱՏՕ-ի գրասենյակում Ալիևը դա համեմատեց Բերձորի միջանցքի հետ՝ փորձելով հղում կատարել նոյեմբերի 9-ի հայտնի հայտարարությանը, իհարկե այդ ամբողջը կեղծիք էր: Այն, որ այս համեմատությունն Ալիևն արեց ՆԱՏՕ-ի գրասենյակում, ամենևին պատահական չէ, որովհետև, վստահ եմ, որ նա չէր համարձակվի նման բան անել նույն Սոչիում Վլադիմիր Պուտինի ներկայությամբ այն պատճառով, որ Բերձորի միջանցքի վերահսկողությունը ռուս խաղաղապահների ձեռքին է ու Հայաստանի հետ անվտանգ կապը իրականացնում են նրանք: Ադրբեջանական քարոզչադաշտը փորձում է այդ հարցերում հավասարության նշան դնել, իսկ դա շատ վտանգավոր է, ու, երկրորդ՝ դա որևէ քննադատության չի կարող դիմանալ, որովհետև նոյեմբերի 9-ի հայտարարության մեջ հստակ նշված է, որ կա 5-կիլոմետրանոց միջանցք, որը վերահսկում են ռուս խաղաղապահները, և կա ճանապարհների ապաշրջափակման մասին թեզ, որի համատեքստում խոսվում է նաև Ադրբեջան-Նախիջևան ուղիղ կապի մասին, բայց դա ընկալվում է ճանապարհ»:
Սոնա Գիշյան
