Հայ-թուրքական երկխոսություն․ Փաշինյանը երկիրը տանում է նոր կանխորոշված պարտության

Հայ-թուրքական երկխոսություն սկսելու առաջարկը Նիկոլ Փաշինյանի համար մանիպուլյացիայի և քաղաքական առևտրի նոր հնարավորություններ է բացել, և գործող իշխանությունները բուռն թափով լծվել են այդ գործին, թեև հստակ գիտակցում են, որ այդ գործընթացում Հայաստանի պարտությունը կանխորոշված է։ Գործող վարչախումբը վաղուց է ապացուցել, որ Հայաստանի շահերն իրեն չեն հետաքրքրում, գործընթացը նրանք օգտագործելու են բացառապես իրենց շահերի, Հայաստանում իրենց իշխանությունը երկարաձգելու նպատակով։ Հենց այդ նպատակով էլ հայկական կողմը որպես բանագնաց նշանակեց ԱԺ փոխնախագահ Ռուբեն Ռուբինյանին, այլ ոչ որևէ փորձառու և բանակցելու հմտություններ ունեցող դիվանագետի։ Ռուբինյանն այդ բանակցություններում ապահովելու է միայն Նիկոլ Փաշինյանի շահը, որը համընկնում է Թուրքիայի շահի հետ։

Փաստացի, հայ-թուրքական երկխոսությանը Թուրքիայի կողմից կլինի երկու, Հայաստանի կողմից՝ ոչ մի բանակցող։ Հայ-թուրքական երկխոսության ծավալմանը երեկ Հանրային հեռուստաընկերության եթերում անդրադարձել է փաշինյանական իշխանության մեկ այլ ձախողված գործիչ ևս՝ Անվտանգության խորհրդի քարտուղար Արմեն Գրիգորյանը։

«Մենք ավելի շատ հայ-թուրքական հարաբերությունները կքննարկենք երկկողմ ֆորմատով, բայց եթե առիթ լինի «3+3»-ում էլ խոսելու, ապա մենք նաև այդ առիթը կօգտագործենք՝ Թուրքիայի հետ շփումներ ունենալու, միմյանց դիրքորոշումներն ավելի պարզ և մատչելի դարձնելու համար»,- ասել է Գրիգորյանը։

Դիտարկմանը՝ արդյո՞ք դա նշանակում է, որ ՀՀ ներկայացուցիչներն էլ Անկարա են գնալու, քանի որ Թուրքիայի ԱԳ նախարարը հայտնել է, որ հաջորդ հանդիպումը Թուրքիայում է կայանալու, հետո նաև՝ Բաքու, իսկ այդ երկրների ներկայացուցիչներն էլ Հայաստան այցելեն, Գրիգորյանն արձագանքել է․ «Եթե առիթ լինի, մենք պատրաստ ենք գնալու, նաև պատրաստ ենք հյուրընկալելու այդ երկրներին՝ մեր մոտ տարածաշրջանային խնդիրների վերաբերյալ քննարկումներ կազմակերպելու»։

Ամեն ինչից զատ, հայ-թուրքական երկխոսության մեջ ուրույն տեղ ունի տնտեսական բաղադրիչը։ Թեև գործող իշխանությունները որևէ հոդաբաշխ եզրակացություն չեն ներկայացրել, թե ինչ հետևանքներ կունենա Հայաստանի համար սահմանների բացումը, որ ոլորտները կհայտնվեն փլուզման կամ կլանման վտանգի ներքո, հստակ է, որ շատ օլիգարխներ իրենց ձեռքերը կտաքացնեն՝ թուրքերի հետ առևտուր և բիզնես անելով։ Սա է իշխաամերձ գործարարների ոգևորության առիթը, նրանց են բաժին հասնելու շահույթները, իսկ կորուստները կկրի ՀՀ բնակչությունը։

Սարգիս Հակոբյան