Գեղարքունիքում գիշերը հանգիստ է անցել, կրակոցներ չկան․ Վերին Շորժա բնակավայրի ղեկավար
ՔԱՂԱՔԱԿԱՆՈՒԹՅՈՒՆ
Դեկտեմբերի 9-ին ադրբեջանական ԶՈՒ ստորաբաժանումները հերթական անգամ սադրանքի են դիմել՝ ժամը 16։25-ից սկսած տարբեր տրամաչափի հրաձգային զինատեսակներից ինտենսիվ կրակ բացելով հայ-ադրբեջանական սահմանի Գեղարքունիքի մարզի հատվածում տեղակայված հայկական մարտական դիրքերի ուղղությամբ։ Հայ-ադրբեջանական սահմանի արևելյան ուղղությամբ ադրբեջանական ԶՈՒ ստորաբաժանումների կողմից իրականացված սադրանքի հետևանքով հայկական կողմից թեթև հրազենային վիրավորում է ստացել երկու զինծառայող։ ժամը 18։00-ի դրությամբ փոխհրաձգությունը դադարել է։ Հիշեցնենք, որ ադրբեջանական զինված ուժերի ստորաբաժանումները դեկտեմբերի 8-ի ուշ երեկոյան, տարբեր տրամաչափի հրաձգային զինատեսակներից կրակ են արձակել հայ-ադրբեջանական սահմանի արևելյան հատվածում տեղակայված ՀՀ ԶՈՒ մարտական դիրքերի ուղղությամբ, և, որ պատասխան գործողություններով հակառակորդի կրակը լռեցվել է։
1or.am կայքը զրուցել է Գեղարքունիքի մարզի Վերին Շորժա բնակավայրի ղեկավար Արտյոմ Երանոսյանի հետ, ով հայտնեց, որ այս պահին ամեն ինչ հանգիստ է․ «Ներկա պահին կրակոցներ չկան, գիշերը հանգիստ է անցել։ Կրակոցներ եղել են դեկտեմբերի 8-ին, ճիշտ է, թշնամին գյուղի ուղղությամբ չի կրակել, բայց կրակոցի ձայները լսելի են եղել։ Գիշերով, ժամը 1-ի կողմերն էր, որ կրակոցները սկսվեցին ու մինչև 4։30 շարունակվեց, որից հետո կրակը դադարեցվեց։ Երեկ ևս եղել են կրակոցներ, արդյունքում ունենք երկու վիրավոր։ Այս պահին կրակոցներ չկան, իսկ գիշերը անցել է հանգիստ»։
Սոնա Գիշյան
