Ի՞նչ կրել Ամանորի գիշերը. մասնագետների խորհուրդը

Յուրաքանչյուր տարի՝ Ամանորի նախաշեմին հարց է առաջանում` ի՞նչ հագուստ կրել, ո՞ր գույներին նախապատվություն տալ: Այս առումով Կարմիր աքաղաղը լայն հնարավորություններ է ընձեռում, պարզապես պետք է ճիշտ կողմնորոշվել:

 ԼՈւՐԵՐ.com-ի թղթակիցը զրուցեց մասնագետների հետ` պարզելու, թե ի՞նչ խորհուրդ կտան կրել Նոր տարվա գիշերը:

 Դիզայներ Դիանա Շատվերյան

- Ամանորի գիշերը գերադասելի է կարմիրի և ոսկեգույնի թե՛ համադրությունը, թե՛ առանձին-առանձին. երկուսն էլ համարվում են տարվա գույներ: Առհասարակ, նորաձև են փայլուն` ցանկացած կտորից և ցանկացած գույնից հագուստները: Նոր տարվա գիշերը գերադասելի են մուգ երանգները: Ինչու եմ ասում ցանկացած գույնի, քանի որ աքաղաղը գույները համադրելու բավականին մեծ հնարավորություններ է տալիս, և կան մարդիկ, որոնց չի սազում, օրինակ՝ կարմիր գույնը, նրանք կարող են ընտրել արծաթագույն, սև, կանաչ գույների երանգները:

 Աքաղաղը սիրում է փայլուն իրեր, փայլ որոշակի կերպով պետք է լինի հագուստի կամ աքսեսուարների մեջ:

 Աքսեսուարներ ընտրելիս չպետք է մոռանալ նայել դիմագծերին՝ որքանով է ճիշտ կրել օրինակ մեծ կամ փոքր օղեր:

 Հագուստի առումով պարտադրող ձևածքներ չկան, որ հենց դա պետք է հագնել:

 2017թ.-ին, տարվա ընթացքում, նորաձև են համարվելու ջինսերն ամեն տարբերակում՝ ջինսե շալվար, վերնաշապիկ և այլն, պարզապես պետք է ճիշտ համադրել դրանք:

Դիզայներ Արամ Նիկոլյան

- Թե ի՞նչ կրել Ամանորի գիշերը, կախված է միջավայրից: Ես չեմ ընդունում, երբ հարդարվում, պճնվում են տանը դիմավորելու համար:

 Թե ի՞նչ գույնի ու ոճի հագուստ ընտրել՝ դա թելադրում է միջավայրը: Հաստատ ոչ մի դիզայներ հատուկ որևէ տենդենցներ ու գույներ չի մտածում Նոր տարվա գիշերը կրելու համար, դա ավելի շատ սնոտիապաշտության հետ է կապված, կան մարդիկ, օրինակ՝ աստղագուշակները, ասում են, քանի որ Կարմիր աքաղաղի տարի է, պետք է պարտադիր կարմիր հագնել, որ հաջողակ տարի լինի: Այս մոտեցումը նորաձևության հետ բացարձակապես կապ չունի:

 Քանի որ վառ տոն է, ցանկալի է վառ գույներ հագնել: Մեր ժամանակներում նորաձևությունը լայն հնարավորություններ է տալիս և յուրաքանչյուր գույն ակտուալ է համարվում: Ամենակարևորը հագուստը ճիշտ համադրելն է և գրագետ լինելը, որպեսզի հագուստի մեջ հարմարավետ լինի:

 Սոնա Հարությունյան