«Իշխանությունների կոկորդը հենց գերիների ծնողներն են կրծելու». Սոֆյա Հովսեփյան

ԱԺ նախկին պատգամավոր Սոֆյա Հովսեփյանի կարծիքով՝ թեպետ նախորդ իշխանությունների ժամանակ շատ դրական բաներ են եղել, բայց նրանք սպառվել են և որպես ընդդիմություն՝ ձախողվել:

«Նախկինում մենք չենք ունեցել անվտանգության խնդիրներ, որովհետև Ադրբեջանը կազմակերպվելու և ուժեղանալու խնդիր ուներ, եթե իրենք, ինչպես հիմա են կազմակերպված եղել, այն ժամանակ լինեին, մենք դարձյալ կունենայինք այդ խնդիրները: Մեկ բանում լրիվ համաձայն եմ՝ որևէ ղեկավար ծնկաչոք և կռացած չի գնացել Ալիևի մոտ: Ես վստահ եմ՝ հաջորդներն էլ չեն լինելու: Սա խոսում է այն մասին, որ այդ մարդը (նկատի ունի Փաշինյանին.- Ռ.Մ.) եկել է ենթարկվելու, իր կերպարը պրոյեկտում է նաև ազգի վրա: Ինքը գուցե դա հենց մտածված է անում. Իր կերպարը պրոյեկտում է ազգի վրա, այսօր ազգն է կռացել արդեն, ինչի՞ մասին է խոսքը: Այսօր մեր երկրի ղեկավարը մեզ բոլորիս ստիպում է կռանալ»,- 168TV-ի «Ռեվյու» հաղորդման ընթացքում ասաց նա:

Նախկին պատգամավորի խոսքով՝ գործող իշխանությունների համար ոչ միայն Արցախը, այլ նաև Հայաստանն իրենցը չէ. «Իրենք այստեղ եկել են տուրիստի նման՝ ժամանակավոր, որքան կարող են վատնեն այս երկիրը, և այս երկրից իրենք գնան: Ավելին ասեմ՝ շատ ուրախ կլինեմ, որ վերջում իրենց գերեզմանը այստեղ չլինի, կամ չէ՝ գուցե լինի, որ մեր սերունդները համապատասխան վերաբերմունք ցուցաբերեն»:

Գերիների հարցերով զբաղվող իրավապաշտպանների կարծիքով՝ Նիկոլ Փաշինյանի օրերս արած հայտարարությունը, թե պետք է քննվի՝ ինչ է նշանակում՝ գերի ընկնել, ինչ հանգամանքներում, շատ վտանգավոր է, քանի որ առ այսօր որևէ մեղադրանք չի առաջադրվել այդ հատկանիշներով, այսինքն, չկա ապացուցված դեպք, իսկ Փաշինյանի հայտարարությունը ադրբեջանական կողմից կարող է օգտագործվել, և կարող են սպառնալ անգամ գերիներին, որ հրաժարվեն Հայաստան վերադառնալուց, քանի որ նրանց սպասելու է քրեական հետապնդում:

Սոֆյա Հովսեփյանից հետաքրքրվեցինք՝ իշխանություններն ինչո՞ւ նոր որոշեցին նման հետաքննություն անցկացնելու վերաբերյալ բարձրաձայնել և իրար հերթ չտալով՝ ամբողջ դաշտը լցնել այդ թեզերով, արդյո՞ք սրանով Փաշինյանն ակնարկում է, որ առհասարակ գերիների վերադարձի հարցը փակված է։

«Նիկոլ Փաշինյանը սրանով փորձում է այնպես անել, որ գերիների ծնողները չպահանջեն գերիների պարտադիր վերադարձը, բայց չի հասկանում, որ ինքը պարտավոր է գերիներին վերադարձնել, և ավելին՝ մենք էլ որպես քաղաքացիներ՝ պարտավոր ենք այդ գերիներին տեր կանգնել, որ ինքն իր ուզածը չանի: Նախ՝ ինքը շատ փոքր է քննելու համար, որովհետև եթե քննի և հասնի նրան, որ հենց իր թողտվության արդյունքում է դա, վերջում կոտրելու է այդ երեխեքի վրա, որովհետև բոլորիս է պարզ, թե ինչ սցենարով է այդ գերիների գերեվարումը կազմակերպվել:

Այստեղ երկրորդ խնդիրն այն է, որ սա ինքը հայտարարել է իրեն արդարացնելու համար, այսինքն՝ ես չեմ վախենում քննել: Այո, դու չես վախենում քննել, որովհետև դու ես քննելու և քո մարդիկ, այ, դու կվախենաս, երբ սա մի անկախ կազմակերպություն քննի և արդար քննի: Այդ ժամանակ դու ոչ միայն չես ուզենա դա լինի, այլ ուղղակի մինչև քննության ավարտը դու այս երկրում չես լինի, որովհետև պարզ կլինի՝ ինչպես 62 գերիները հայտնվեցին գերության մեջ Խծաբերդից հետո, ինչպես գերեվարվեցին Սև լճից, Վարդենիսից, մի քանի օր առաջ գերեվարվեցին: Միակ բանը, որ կարող են անել՝ գործը փակեն, որ իրենց վրայից մաքրեն և ինչ-որ անհատների վրա գործ կարեն:

Մեր ռազմական ոստիկանությունը շատ լավ դրանով է զբաղված, նրանց մեջ ոչ մի մարդկային արժեք չկա: Բայց այդպես չի լինելու՝ ոչ այդ գերիների ընտանիքներն են լռելու… իրենց կոկորդը հենց գերիների ծնողներն են կրծելու, որովհետև իրենց երեխեքին, բացի այն, որ գերեվարեցին, այլ այն ապրումներն ու նվաստացումները, որ այդ գերիներն են ապրում, իրենց ամբողջ կյանքն է հետագայում կազմակերպելու: Որևէ մեկը գնացե՞լ խոսել է գերիների հետ իրենց ապրումների մասին: Գերության մեջ գտնված մարդն ասում է՝ ես երազում էի Հայաստանում ապրեի և ապրեի իմ ամենավատ օրերը, որոնք ինձ համար ամենաերջանիկ օրերը կհամարվեին: Սրանից ավել էլ ինչի՞ մասին է խոսքը»,- ի պատասխան՝ ասաց նախկին պատգամավորը:

Սոֆյա Հովսեփյանին նախկինում թվացել է, թե ճանաչել է Նիկոլ Փաշինյանին, բայց հիմա հասկանում է, որ մինչև հիմա էլ նրան չի ճանաչում.

«Մեկ է՝ չես ճանաչում, որովհետև ամեն դիմակը հանում ես, էլի դուրս է գալիս: Անգամ երևակայությունդ թույլ չի տալիս հասկանալ՝ հետո ինչ կա»:

Ըստ նրա՝ Փաշինյանն ու իր թիմը կհեռանան այն ժամանակ, երբ բոլոր քաղաքացիները հասկանան, որ պարտված, կռացած ղեկավարն այլևս չի կարող իր ողնաշարն ուղղել՝ թշնամու հետ հանդիպելիս.

«Նա պետք է գնա, և օր առաջ գնա, և պետք է գա մարդ, որը սկսում է իրապես զրոյական կետից՝ իր արժանապատվությամբ և իր արժեքներով, և այս գաղափարի շուրջ համախմբի յուրաքանչյուր մարդ: Մարդիկ պետք է հասկանան, որ նրա ամեն մի օր ավել մնալը հայ մարդու գոյության համար վտանգ է: Բայց կա նաև երկրորդ տարբերակը, որ ինքը ոչնչացնի ամեն ինչ, ու ոչ թե հրաժարական տա, այլ փախչի, ինչը նորից հավանական տարբերակ է: Բայց այդ ժամանակ մենք ոչինչ չենք կարողանա անել, որովհետև մենք այլևս հայրենիք չենք ունենա»

Մանրամասները՝ 168TV-ի տեսանյութում