Հայաստանը հաջողությամբ խոցել է ադրբեջանական հակաօդային պաշտպանության համակարգերը
ՀԱՍԱՐԱԿՈՒԹՅՈՒՆ
avia.pro-ն գրում է, որ Հայաստանի տարածք ադրբեջանական զորքերի ներխուժումից հետո Ադրբեջանի զինված ուժերը տեղակայել են իրենց ռադարները և հակաօդային պաշտպանության համակարգերը՝ ըստ երևույթին նպատակ ունենալով վերահսկել ինչպես Հայաստանի ռազմաօդային ուժերի, այնպես էլ Ռուսաստանի օդատիեզերական ուժերի անօդաչու սարքերն ու մարտական ինքնաթիռները։ Այնուամենայնիվ, Հայաստանի կողմից ժամանակին հայտնաբերված այդ հակաօդային պաշտպանության համակարգերը օպերատիվ կերպով ոչնչացվել են։
Ներկայացված լուսանկարում, որը հրապարակել են Հայաստանի զինված ուժերի ներկայացուցիչները, երևում է ոչնչացված P-18 ռադարը։ Չնայած այն հանգամանքին, որ այդ ռադարը մշակվել է դեռ Խորհրդային Միությունում, այն ունի բարձր արդյունավետություն մանր և ցածր թռչող թիրախներ հայտնաբերելու գործում: Ավելին, աղբյուրները նշում են, որ դա Ադրբեջանի ԶՈւ-ի միակ ՀՕՊ համակարգը չէ, որը ոչնչացվել է մի քանի ժամվա ընթացքում, հարվածներ են հասցվել նաև բուն Ադրբեջանի տարածքում տեղակայված հակաօդային պաշտպանության համակարգերին։
Պաշտոնական տվյալներով Հայաստանի վրա հարձակման արդյունքում Ադրբեջանը լուրջ կորուստներ է կրել, ճշտվում է զոհված, վիրավորված և գերի ընկած ադրբեջանցի զինվորների թիվը։ Փորձագետներն ուշադրություն են հրավիրում այն փաստի վրա, որ նոր լայնամասշտաբ բախումների վտանգը պահպանվում է, քանի որ Հայաստանի տարածքի մի քանի տասնյակ քառակուսի կիլոմետր դեռևս գտնվում է Ադրբեջանի զինված ուժերի վերահսկողության տակ։
Նյութը հրապարակման պատրաստեց Կամո Խաչիկյանը
