Ռուս խաղաղապահների ներկայությունը միշտ անհրաժեշտ կլինի. ՀՀ նախագահ

Այն, ինչ անում են խաղաղապահները, մեծ նշանակություն ունի թե՛ տարածաշրջանային քաղաքականության, թե՛ Ղարաբաղի կարգավիճակի, տարածաշրջանի ապագայի, վաղը պատերազմը բացառելու շուրջ հնարավոր բանակցությունների տեսանկյունից: Այս մասին հայտարարել է ՀՀ նախագահ Արմեն Սարգսյանը «Аргументы и Факты» պարբերականին տված հարցազրույցի ժամանակ՝ պատասխանելով հարցին, թե ինչպես է գնահատում Ղարաբաղում ռուս խաղաղապահների աշխատանքը։

Այս մասին տեղեկացնում են ՀՀ նախագահի աշխատակազմից։

Արմեն Սարգսյանի կարծիքով՝ խաղաղապահների ներկայությունը միշտ անհրաժեշտ կլինի։

«Չգիտեմ՝ կկարողանաք ճիշտ բառ գտնել՝ փոխանցելու իմ զգացողությունները: Ռուսական բանակը տասնամյակներով, հարյուրամյակներով գտնվում է այս տարածաշրջանում: Նրա ներկայությունը չափազանց կարևոր է: Այն, ինչ անում են խաղաղապահները, մեծ նշանակություն ունի թե՛ տարածաշրջանային քաղաքականության, թե՛ Ղարաբաղի կարգավիճակի, տարածաշրջանի ապագայի, վաղը պատերազմը բացառելու շուրջ հնարավոր բանակցությունների տեսանկյունից»,-ասել է նա:

Սարգսյանը շնորհակալություն է հայտնել խաղաղապահներին ծառայության, ՌԴ նախագահ Վլադիմիր Պուտինին՝ դժվար որոշում ընդունելու համար։

Նա նաև նշել է, որ Ռուսաստանում միշտ շատ ընկերներ է ունեցել, բայց առանձնացրել է ՌԴ Վիկտոր Չեռնոմիրդինին (ՌԴ վարչապետ 1992-1998 թթ-խմբ.)։

«Սակայն կա ընկերություն, որի մասին չի կարելի մոռանալ՝ Վիկտոր Ստեպանովիչ Չեռնոմիրդինի հետ: Մենք ծանոթացանք 1985 թվականին և, ստացվեց այնպես, որ միանգամից ընկերացանք: Երբ ես դարձա վարչապետ, շատ հարցեր շատ արագ էին լուծվում: Մոսկվա կատարած իմ առաջին իսկ այցի ժամանակ մենք ստեղծեցինք «ԱրմԳազՊրոմ»-ը, որն այժմ կոչվում է «Գազպրոմ Արմենիա»: Մտածեցինք մի գիշերվա ընթացքում, իսկ հաջորդ օրը հուշագիր ստորագրեցինք»,-հիշել է Արմեն Սարգսյանը:

Նա հավելել է, որ շատ լավ հարաբերություններ ունի Վլադիմիր Պուտինի հետ, շեշտելով, որ չնայած միջպետական կապերը չեն կարող կառուցվել երկրի ղեկավարների համակրանքների կամ հակակրանքների վրա, այդուհանդերձ, անձնական հարաբերությունները մեծ նշանակություն ունեն: