Խաչատուր Սուքիասյանի եղբորը ազատ են արձակել, իսկ ընդդիմադիրներին շարունակում են պահել կալանքի տակ

Ազգային ժողովի «Քաղաքացիական պայմանագիր» խմբակցության պատգամավոր, ոչ անհայտ օլիգարխ Խաչատուր Սուքիասյանի եղբորը ազատ են արձակել գրավի դիմաց։ Երբ Ռոբերտ Սուքիասյանին օրեր առաջ կալանավորվում էին, մենք անվրեպ կերպով կանխատեսեցինք, որ Երևանի կենտրոնում կրակոցներ արձակելու մեջ մեղադրվող և իշխանության հետ սերտ առնչություններ ունեցող անձը երկար չի մնա կալանքի տակ։ Երեկ Երևան քաղաքի ընդհանուր իրավասության դատարանը՝ դատավոր Վաչե Մարգարյանի նախագահությամբ, բավարարել է հայտնի գործարար Խաչատուր Սուքիասյանի եղբորը` Ռոբերտ Սուքիասյանին գրավի դիմաց ազատ արձակելու միջնորդությունը։ Գրավի չափ է սահմանվել 50 մլն դրամը։ Միևնույն ժամանակ, Երևանի նույն դատարանը շաբաթներ շարունակ խոչընդոտում է ԱԺ «Հայաստան» խմբակցության պատգամավոր, առողջական լուրջ խնդիրներ ունեցող բժիշկ Արմեն Չարչյանին կալանքից գրավի դիմաց ազատելու միջնորդության քննարկմանը։

Չարչյանը, ըստ փաստաբանների, առողջական ծանր վիճակում է գտնվում, նրան ազատելու հարցը հրատապ է, սակայն դատարանը երեկ կարողացել է միայն նշանակել նրա առողջական վիճակը ստուգող հանձնաժողովի փորձագետներ միայն կեսին։ Առողջապահության նախարարությանն է հանձնարարվել ապահովել Արմեն Չարչյանի փորձաքննությունը, և այդ նախարարությունը ամեն գնով խափանում է փորձաքննությունը, որպեսզի հնարավորինս երկար պահի Չարչյանին կալանքի տակ։ Փաստացի, Հայաստանի Հանրապետությունում բոլոր գործընթացները կատարվում են մի փոքրիկ և չարագույժ բռնապետիկի կամքով։ Նրա ցանկությամբ ազատ են արձակում Երևանում օրը ցերեկով մարդկանց վրա կրակողներին և կալանքի տակ պահում, անվանի, բայց ընդդիմադիր բժշկին։ Բռնապետությունը պոզով-պոչով չի լինում, պարոնայք։ 

Արմեն Միքայելյան