Ընդդիմության մուտքը դիրքեր թույլ չեն տալիս

Հայաստանի գործող իշխանությունները՝ Նիկոլ Փաշինյանի գլխավորությամբ, ամեն ինչ անում են, որ թույլ չտան ԱԺ ընդդիմադիր խմբակցությունների պատգամավորների մուտքը սահմանային դիրքեր։ ԱԺ «Պատիվ ունեմ» դաշինքից պատգամավոր Տիգրան Աբրահամյանն է արձանագրել, որ ընդդիմության համար առաջնագիծը փակ է, որովհետև նման քաղաքական որոշում է «վերևից» իջեցված։

«Մինչ դռնփակ նիստում պաշտպանության նախարարը «պարզաբանում էր», թե ինչո՞ւ է արգելվում ինձ՝ որպես պաշտպանության և անվտանգության հարցերով հանձնաժողովի մշտական անդամ, այցելել սահմանագիծ, պարզվեց, որ նույն հանձնաժողովի իշխանությունը ներկայացնող անդամները նախորդ շաբաթ հնարավորություն ունեցել են այցելելու։ Նախարարի պարզաբանումը փակ նիստում էր՝ չեմ հանրայնացնի, բայց նույն «խնդիրները» ենթադրում է, որ խաղի կանոնները պետք է գործեն բոլորի համար։ Եվս մեկ անգամ համոզվեցի՝ ընդդիմության համար առաջնագիծը փակ է, որովհետև նման քաղաքական որոշում է «վերևից» իջեցված»,- նշել է Աբրահամյանը։

Օրեր առաջ ԱԺ պաշտպանության և անվտանգության հարցերի հանձնաժողովի իշխանական անդամները վոյաժներ են կատարել սահմանային դիրքեր, անձամբ ծանոթացել իրավիճակին, իսկ այսօր ընդդիմությանն արգելում են հայտնվել այդ տարածքներում, անձամբ տեղեկանալ, թե ինչ է կատարվում։ Ըստ էության, «Քաղաքացիական պայմանագիրն» ու իր տխրահռչակ պրագլուխը խախտում են հավասարության սկզբունքը, արգելափակում ընտրված պատգամավորների լիազորությունների իրականացմանը։ Իսկ իշխանական պատգամավորները, որոնք, բնականաբար, որևէ բառ չեն ասի խնդիրների մասին, որևէ խոչընդոտի չեն հանդիպում։

Հայաստանի Հանրապետության կոլաբորացիոնիստական իշխանությունները թքած ունեն ժողովրդավարության բոլոր սկզբունքների, ՀՀ անվտանգության վրա և իրենց յուրաքանչյուր քայլն անում են ըստ իրենց քաղաքական նպատակահարմարության։ 

Սարգիս Սամսոնյան