Ի՞նչ կարճաժամկետ հետևանքներ են լինում COVID-19-ից հետո

COVID-19-ից ապաքինվելուց հետո հնարավոր կարճաժամկետ հետեւանքներ կարող են լինել վատ տրամադրությունը եւ քրոնիկական հոգնածությունը։ Այսպիսի կարծիք է արտահայտել հոգեբույժ Անդրեյ Նազարովը (Ռուսաստան)։

ՏԱՍՍ-ը տեղեկացնում է, որ դա կապված է ասթենիկ համախտանիշի հետ, որը խորանում է տեղեկատվական ֆոնի հետ կապված։

«Գրիպից կամ ցանկացած այլ շնչառական հիվանդություններից հետո երկու-երեք շաբաթ երբեմն մեզ լավ չենք զգում, չենք ցանկանում շփվել մարդկանց հետ, արագ հոգնում ենք՝ չնայած արդեն ապաքինվել ենք։ Սրանք ասթենիայի դասական ախտանշաններն են։ Կորոնավիրուսային վարակի խնդիրն այն է, որ այն որոշակի կարգավիճակ ունի։ Մարդիկ վախեցած են։ Մարդը, անգամ եթե սովորական մրսածություն է ունեցել, արդեն նախապես մտածում է, որ տառապում է ծանր եւ անբուժելի հիվանդությամբ»,- բացատրել է մասնագետը։

Նրա խոսքով՝ այդ վիճակը, որպես կանոն, COVID-19-ից ապաքինվածների մոտ շարունակվում է մոտ մեկ ամիս, բայց սովորաբար ավարտվում է բարեհաջող։ Ֆիզիկական հոգնածությունից բացի շատերը նաեւ հոգեբանական հոգնածություն են զգում, ինչն, իր հերթին, կարող է հանգեցնել դեպրեսիայի։

Խնդիրներից խուսափելու համար մասնագետը խորհուրդ է տվել չփնտրել գլխում առաջացող հարցերի պատասխանները ինտերնետում, այլ ուժերի բացակայության դեպքում դիմել թերապեւտի կամ հոգեբանի։