Լավագույն կառավարությունը նրանք են, ովքեր ունենում են ռազմավարական հաղորդակցման համակարգ
ՔԱՂԱՔԱԿԱՆՈՒԹՅՈՒՆ
Ադրբեջանի վերահսկողության տակ անցած Քաշաթաղի (Լաչին) շրջանում այսօրվանից մեկնարկել են ադրբեջանական կողմի զորավարժությունները:
Այս թեմայով զրուցել ենք քաղաքագետ Թևան Պողոսյանի հետ։
Հարցին, թե ի՞նչ նպատակ ունի թշնամու այդ զրոավարժությունները` Թևան Պողոսյանը ասել է, որ Ադրբեջանը հստակ նպատակ է դրել իր առաջ և գնում է այդ նպատակի իրականացմանը. «Մեր հարցն է մնում, թե մենք ոնց ենք դրան վերաբերվում, սկսած նրանից, թե ինչպես ենք քաղաքական ձևակերպում տալիս՝ որտե՞ղ է Ադրբեջանը զորավարժություններ անում, արդյո՞ք նշվում է՝ Արցախի Հանրապետության Բերձորի տարածաշրջան, որը օկուպացված է Ադրբեջանի զորքերի կողմից: Եթե այդպես ենք մեր մտահոգությունները հայտնելու, դա կլինի ճիշտ մոտեցում ապագայի համար, նաև՝ իրավական ձևակերպման շրջանակներում»:
Դիտարկմանը՝ դե, եթե Գորիս-Կապան ճանապարհահատվածի մասին իշխանություններն ասում են, որ ադրբեջանական տարածք է, նա այդպես արձագանքեց. «Ամենահետաքրքիրն այն է, որ այդ նախադասությանը որևէ կերպ չեն արձագանքում, բայց այսօր ԱԺ պաշտպանության հանձնաժողովի նիստի ժամանակ հարցին, որը մտահոգություն է մարդու, ով ապրում է Կապանում և Կապանի անվտանգության մասին հարց է, իշխանությունները պատասխանում են, թե՝ այ, դուք որ այսպիսի հարց եք տալիս, Ադրբեջանը… Եթե հարց է առաջանում, պետական համակարգը պետք է հասկանա, որ իր մեղքի բաժինը կա, հանրությանը նախօրոք չի իրազեկել: Լավագույն կառավարությունը նրանք են, ովքեր ունենում են ռազմավարական հաղորդակցման համակարգ: Կա ժողովրդավարության ոսկի կանոն՝ հանրությունն իրավունք ունի իմանալ, իշխանությունը պարտավոր է թափանցիկ և բաց հաշվետու լինել, և ամենակարևորը՝ հիմնավորել իր տեղեկությունները»:
Սոնա Գիշյան
