2022թ. վերջին կմեկնարկեն կորոնավիրուսի եւ գրիպի դեմ միասնական պատվաստանյութի փորձարկումները
ՀԱՍԱՐԱԿՈՒԹՅՈՒՆ
Ռուսաստանում մշակել են գրիպի եւ կորոնավիրուսի դեմ միասնական պատվաստանյութի տեխնոլոգիական պլատֆորմ։ Դրա կլինիկական փորձարկումները կսկսվեն 2022թ. վերջին, հավաստիացնում է Գամալեայի անվան կենտրոնի ղեկավար Ալեքսանդր Գինցբուրգը։
«Եթե այդ պլատֆորմի հետ կապված ամեն բան լավ լինի, հենց այդ տեխնոլոգիան աշխատի, ապա այդ ժամանակ կանցնենք ավելի բարդ տարբերակի՝ մեկ պատվաստանյութում միաժամանակ գրիպի հեմագլյուտինինի եւ համապատասխանաբար՝ կորոնավիրուսի S-սպիտակուցների հակագենների համատեղմանը»,- ասել է նա։
Ինչպես գրում է «Իզվեստիա»-ն, գրիպի եւ կորոնավիրուսի դեմ միասնական պատվաստանյութ ստեղծելն անհրաժեշտ է, քանի որ այդ հիվանդություններով միաժամանակ հիվանդանալը զգալիորեն բարձրացնում է սեզոնային գրիպի ծանր ընթացքի եւ դրանից մահվան ելքի ռիսկը։ Ինչպես հավաստիացնում է Գամալեայի անվան կենտրոնի գլխավոր գիտաշխատող Վիկտոր Զուեւը, միայն գրիպի կամ միայն կորոնավիրուսի դեմ պատվաստվելը բավական չէ իմունիտետի ստեղծման համար, քանի որ դրանք երկու տարբեր վիրուսներ են։
«Բանն այն է, որ նման է հիվանդության «առարկան»՝ շնչառական համակարգը, բայց այդ հիվանդություններն, ընդհանոււր առմամբ, խիստ տարբերվում են միմյանցից»,- ասել է մասնագետը։
