Մասնագետները գնահատել են COVID-19-ի դեմ դեղամիջոցի արդյունավետությունը
ՀԱՍԱՐԱԿՈՒԹՅՈՒՆ
Մասնագետները գնահատել են մոլնուպիրավիրի՝ COVID-19-ի դեմ դեղամիջոցի արդյունավետությունը: Կլինիկական փորձարկումների երրորդ փուլի ընթացքում հաբերի տեսքով դեղամիջոցը 2 անգամ նվազեցրել է հոսպիտալացման հավանականությունը, ինչպես նաեւ նվազեցրել մահվան վտանգը: Այս մասին իրենց հայտարարության մեջ հաղորդել են դրա մշակողները՝ Merck եւ Ridgeback Biotherapeutics ընկերությունները, որոնք այս պահին սպասում են տարբեր երկրների կարգավորիչների կողմից դեղի գրանցմանը:
MOVe-OUT-ի հետազոտությունն անցկացվել է ամբողջ աշխարհում, եւ դրան մասնակցել են COVID-19-ի թեթեւ եւ չափավոր ընթացքով 775 կամավորներ: Յուրաքանչյուր կամավոր ունեցել է ծանր կորոնավիրուսային վարակի առնվազն մեկ ռիսկի գործոն, այդ թվում՝ ճարպակալում, ծերություն, շաքարային դիաբետ եւ սրտանոթային հիվանդություններ: Մասնակիցների գրեթե 80%-ը վարակվել է կորոնավիրուսի նոր տարբերակներով՝ «գամմա», «դելտա» եւ «մյու»:
Պացիենտներին բաժանել են երկու խմբի` պլացեբո եւ այն մարդկանց, ովքեր 5 օրվա ընթացքում օրական երկու անգամ 4 հաբ մոլնուպիրավիր են ստացել: 30 օրվա ընթացքում հոսպիտալացվել է դեղը ստացած մասնակիցների 7,3%-ը, պլացեբոյի խմբի մարդկանց՝ 14,1%-ը: Հաբեր ընդունողներից ոչ մեկը չի մահացել՝ ի տարբերություն հսկիչ խմբի 8 պացիենտների:
