Նիկոլ Փաշինյանը կորցրել է իր հենարանը

2018թ․ Նիկոլ Փաշինյանն իշխանության եկավ նաև նոր սոցցանցերում իր հիպերակտիվության, ցանկացած դեպք և միջոցառում ուղիղ եթերում լուսաբանելու, նույնիսկ ամենափոքր առիթով հանրության հետ ուղիղ շփվելու շնորհիվ։ Նախկին իշխանությունները նման սովորություն չունեին, հանրության հետ շփվում էին պաշտոնական խողովակներով, իսկ իշխանության ներկայացուցիչներից հատուկենտներն էին օգտագործում «Ֆեյսբուքը» կամ այլ սոցցանցեր։ Վարչապետ դառնալուց հետո էլ Փաշինյանը չդադարեց ուղիղ եթեր մտնելու սովորույթից։ Նա լայվեր էր անում նույնիսկ իր աշխատասենյակի զուգարանից, սելֆիներ՝ պաշտոնական հանդիպումներից, անդադար ուղերձներ ու կոչեր հղում, իր ճաշակի և դաստիարակության չափով իբր հումորային գրառումներ անում։

Արցախյան 44-օրյա պատերազմից հետո նա ուղիղ եթերներ էր անում ԳՇ բունկերից։ Իսկ այսօր արդեն նրա ֆեյսբուքյան էջը չի տարբերվում կառավարության պաշտոնական կայքից։ Նախկինում ուղիղ եթերների փոխարեն նրա էջում միայն մոնտաժված կադրեր են տարբեր միջոցառումներից։ «Եռաբլուր», Զինվորի տուն, ցանկացած այլ վայր նրա այցերը լուսաբանվում են միայն մոնտաժված տեսանյութերով։ Ինքը Փաշինյանն էլ հնարավորինս խուսափում է հանրության հետ դեմ առ դեմ շփվելու հնարավորությունից, վախենում է, թե երեսին մարդիկ կասեն, թե ինչ են մտածում նրա մասին։ Երեկ նախատեսված էր, որ Փաշինյանը «Եռաբլուր» կայցելի մյուս պաշտոնյաների հետ, առավոտյան ժամը 9-ին, սակայն «պատահաբար» նա այցելեց փոքր շքախմբով և մեծ թիկնազորով, մեկ և կես ժամ շուտ։ Սա, իհարկե, խոսում է նրա թուլության և թուլացման մասին։ Փաշինյանի կողմնակիցները որպես նրան նախընտրելու փաստարկ միշտ են նշում վարչապետի պաշտոնը զբաղեցնող անձի՝ իբր հասանելի լինելու փաստը։ Եվ այսօր, նրա այս պահվածքը նույնիսկ իր կողմնակիցներին է վանելու։ Արդյունքում Նիկոլ Փաշինյանը մնալու է մեն-մենակ։ Եվ այդ օրը բոլորովին էլ հեռու չէ։

Արսեն Կարապետյան