Գետինը մտնելու իրականություն

Նիկոլ Փաշինյանի իշխանության ներկայացուցիչները, սպասարկու քաղաքագետներն ու զոմբիները երեկ երեկոյան աղմուկ էին բարձրացրել սոցցանցերում՝ ԵԽԽՎ-ում ընդունված բանաձևը ներկայացնելով որպես փաշինյանական «հանճարի» դրսևորում և հայ դիվանագիտության, թերևս, մինչ օրս ունեցած «մեծագույն հաղթանակ»։ Իրականությունը, սակայն, բոլորովին այլ է։ ԵԽԽՎ-ում Ադրբեջանի պատվիրակության առաջարկով ընդունված բանաձևում այսուհետ Շուշիի Ղազանչեցոց Սուրբ Աստվածածին եկեղեցին կանվանվի Ղազանչի։ Բնականաբար, այս մասին ռուբենռուբինյաններն ու Փաշինյանի մյուս մանկլավիկները բառ անգամ չեն ասել։

Շուշիի դավաճանական կորստից հետո սա երկրորդ հարվածն է հայ հանրությանը, և խարխլում է Նիկոլ Փաշինյանի դիրքերը։ Փոխարենը, իշխանությունը փորձելու է նույնիսկ մեկ տառի փոփոխությունը ներկայացնել դիվանագիտական ձեռքբերում։ «Գետինը մտնելու իրողություն․ մշակութային վանդալիզմն էլ ինչպե՞ս է լինում։ Սա մեր մշակութային ինքնության ոչնչացումն է՝ հայ պատգամավորների ներկայությամբ։ Ու ԵԽԽՎ մեծամասնությունը, մեր եվրոպացի քույրերն ու եղբայրները մեծամասնությամբ քվեարկում են, որ ճարտարապետ Սիմոն Տեր-Հակոբյանի նախագծով 1887թ․ կառուցված մեր եկեղեցին պարզապես Ղազանչի կոչվի։ ԵԽԽՎ պատվիրակություն և պատվիրակության ղեկավար Ռուբեն Ռուբինյան, դուք ինչպե՞ս եք շարունակելու պաշտպանել ՀՀ շահերը, երբ բացահայտ իրողություններն ու պատմական ճշմարտությունը պաշտպանելու ունակություն չունեք»,- գրել է «Հայաստան» դաշինքի պատգամավոր Լիլիթ Գալստյանը։ Իսկ մենք արդեն չենք զարմանում, վաղուց կորցրել ենք այդ հատկությունը։

Մանվել Մանարյան