«Հեզաճկուն պորտապար»․ Ադրբեջանի հոխորտանքներն ու Փաշինյանի նվաստացումը

ՄԱԿ Գլխավոր ասամբլեայի 76-րդ նստաշրջանում շարունակվում է Հայաստանի նվաստացումը․ Ադրբեջանի նախագահ Իլհամ Ալիևի հոխորտանքներին վարչապետի պաշտոնը զբաղեցնող Նիկոլ Փաշինյանը պատասխանեց խեղճացած, անատամ, ոչինչ չասող ելույթով։ Նախօրեին Իլհամ Ալիևը կես ժամից ավելի միջազգային հանրությանը հպարտությամբ պատմում էր Հայաստանի պարտության մասին, նշում, թե հաղթել է Սերժ Սարգսյանին և Ռոբերտ Քոչարյանին, Հայաստանին մեղադրում պատերազմական հանցագործությունների, ցեղասպանության, էթնիկ զտումների, մշակութային, քաղաքային, ջրային, էկոլոգիական և այլ բարբարոսությունների մեջ, միջազգային հանրությանն էլ հորդորում այլևս չօգտագործել հայկական տեղանունները, քանի որ «Լեռնային Ղարաբաղ» հասկացություն այլևս չկա։ Այդ ելույթից հետո շատերն էին պնդում, որ Փաշինյանը պարզապես չի համարձակվելու համարժեք ելույթ ունենալ։ Այդպես էլ եղավ։

Ընդամենը 10 րոպեանոց ելույթում վարչապետը հայտարարեց, թե Հայաստանը պատրաստ է կառուցողական երկխոսության, որը պետք է հանգեցնի տարածաշրջանում կայուն և հարատև խաղաղության հաստատմանը, խոսեց խաղաղ դարաշրջան բացելու, տարածաշրջանային կոմունիկացիաների բացման, սահմանագծման ու սահմանազատման պատրաստակամության մասին, չպատասխանեց մեր երկրին հասցեագրված մեղադրանքներին։ Փոխարենը կրկին չարչրկեց «թավշյա հեղափոխություն» և «ժողովրդավար ընտրություններ», առանց այն էլ բռնաբարված հասկացությունները։ «Հեզաճկուն պորտապար», ՀՀԿ փոխնախագահ Արմեն Աշոտյանի այս մի ձևակերպումը լիովին արտացոլում է Նիկոլ Փաշինյանի անողնաշար ելույթի էությունը։

Գարիկ Նիկոյան