Ապրեցնելով Ստեփանակերտի լեգենդար թատրոնը, կապրեցնեն նաև արցախցուն

Ստեփանակերտի Վահրամ Փափազյանի անվան դրամատիկական թատրոնը հյուրախաղերով Երևանում է։ Թատրոնը երևանյան հանդիսատեսին երեք օր կներկայացնի Նարինե Աբգարյանի «Երկնքից երեք խնձոր ընկավ» վեպի հիման վրա ստեղծված համանուն ներկայացումը՝ Կարինե Քոչարյանի բեմադրությամբ։

Երևանի հանդիսատեսին ներկայանալուց հետո Հայաստանի թատերական գործիչների միության նախաձեռնությամբ Ստեփանակերտի դրամատիկական թատրոնը հյուրախաղերով հանդես կգա Արարատի, Կոտայքի, Լոռու, Շիրակի մարզերում։ Բեմադրությունը «Թատերական Լոռի» փառատոնի շրջանակում սեպտեմբերի 29-ին և 30-ին կներկայացվի Տաշիրում և Ալավերդիում։

«Երկնքից երեք խնձոր ընկավ» ներկայացման երևանյան առաջնախաղը տեղի ունեցավ սեպտեմբերի 17-ին՝ Հ․ Պարոնյանի անվան երաժշտական կոմեդիայի թատրոնում:

Ներկայացման ավարտին բեմադրիչ, ռեժիսոր Կարինե Քոչարյանը շնորհակալություն հայտնեց հանդիսատեսին ներկա գտնվելու համար, քանի որ, նրա գնահատմամբ՝ այդպիսով նրանք սատարում են Արցախին, կանգնում են Արցախի կողքին։

«Այսօր մենք մի փոքր Արցախ էինք բերել ձեզ։ Ես ուզում եմ շնորհակալություն հայտնել այս իմ հրաշք ընտանիքին՝ դերասաններին, եթե միայն իմանաք, թե նրանք ինչերի միջով են անցել, նրանց համար շատ դժվար էր բեմ բարձրանալ։ Եթե միայն իմանայիք, թե ինչքան դժվար է եղել, օրինակ, իմ Ռուզաննայի համար, ում տղան պատերազմից հրաշքով է փրկվել և դժվարությամբ է կարողացել ոտքի կանգնել, դժվար է այս բոլոր տղամարդկանց համար, որոնք պատերազմի մասնակիցներ են։ Հավատացեք, դժվար է ոտքի կանգնել, բայց դա դժվար չէ արցախցու համար, հավատացեք։ Իմացեք, արցախցին աննկուն է, նա ամուր կանգնած է իր հողի վրա, ես ձեզ հետ միասին ուզում եմ խոնարհվել արցախցիների ու Արցախ աշխարհի առջև»,- շեշտեց Կարինե Քոչարյանը։

Թատերական գործիչների միության նախագահ, Հ. Պարոնյանի անվան երաժշտական կոմեդիայի թատրոնի գեղարվեստական ղեկավար և գլխավոր ռեժիսոր Հակոբ Ղազանչյանը նույնպես շնորհակալություն հայտնեց թատրոնի դերասաններին՝ իրենց ցուցաբերած հերոսության համար, քանի որ գիտի, թե նրանք ինչերի միջով են անցել։

«Մենք երբեք չէինք պատկերացնում, որ այսքան շուտ դուք ուժ կգտնեք ձեր մեջ և կբացեք Ստեփանակերտի լեգենդար թատրոնի վարագույրը։ Եթե դուք ձեր մեջ ուժ գտաք և այսքան արագ համախմբվեցիք ու գործի անցաք, կասկած չունեմ, որ ապրեցնելով Ստեփանակերտի լեգենդար թատրոնը, կապրեցնեք նաև արցախցուն։ Շնորհակալ եմ նաև Կարինե Քոչարյանին, նա պատերազմից անմիջապես հետո ուզում էր ժամ առաջ գալ Արցախ, քանի որ ապրում էր ԱՄՆ-ում։ Նա բոլորին զանգում էր ու ուզում էր գալ ու իր լուման ունենալ թատրոնի վերականգնման հարցում։ Քչերն էին պատկերացնում, որ պատերազմից հետո այնտեղ կարելի է ինչ-որ բան անել, բայց փառք ու պատիվ կոլեկտիվին ու Կարինեին, ով եկավ ու 6 ամիս ապրեց Արցախում, աշխատեց, որի արդյունքն այսօր բոլորդ տեսաք»,- ընդգծեց Հակոբ Ղազանչյանը։

Արցախից Երևան եկած դերասաններն իրենց բեմադրությամբ ուժ փոխանցեցին հանդիսատեսին՝ սովորեցնելով, որ պայքարը միշտ արդյունք է տալիս՝ գլխավոր հերոսների՝ 58-ամյա Անատոլիայի և 67-ամյա Վասիլի օրինակով, որոնք իրենց կյանքի ընթացքում տեսնելով սով, երկրաշարժ ու պատերազմ, կորցնելով բոլոր հարազատներին, կարողացել են ոտքի կանգնել, ամուսնանալ և ծերացող հին շենին նոր կյանք տալ՝ երկու զավակ լույս աշխարհ բերելով։

Գլխավոր հերոսուհուն՝ Անատոլիային մարմնավորած դերասանուհի Օֆելյա Մարտիրոսյանն իրական կյանքում էլ ունեցել է իր ողբերգությունը՝ Արցախի 44-օրյա պատերազմի ընթացքում կորցրել է ամուսնուն, որը նոյեմբերի 8-ին հերոսաբար զոհվել է Շուշիի մատույցներում։ Ամուսնու կորստից հետո Օֆելյան կարողացել է իր մեջ ուժ գտնել և բեմ բարձրանալ։

Վասիլին մարմնավորող Մարատ Դավթյանը 44-օրյա պատերազմի մասնակից է, նրան ճանաչողներն ասում են, որ պատերազմի ժամանակ և՛ կռվել, և՛ Հադրութի անտառներից հանել է հայ զինվորների դիերը, քանի որ անտառի տեղանքին լավ ծանոթ է եղել։ Պատերազմի դաժանություններից հետո Մարատ Դավթյանը մի քանի տարով ծերացել է, մի բուռ դարձել, բայց դրանով հանդերձ՝ նա բեմից իր խաղով ուղերձ հղեց բոլորին՝ պայքարել տունն ու շենը պահելու համար։