Ադրբեջանը փորձում է դուրս մղել Ռուսաստանին Արցախից, կամ․․․

Ադրբեջանը փորձում է դուրս մղել Ռուսաստանին Արցախից, կամ էլ, ռուս խաղաղապահների մանդատի հաստատումը ձգձգելով, նոր զիջումներ կորզել։ Ադրբեջանի նախագահի խորհրդական Հիքմեթ Հաջիևը BBC-ի ադրբեջանական ծառայությանն ասել է, թե Ղարաբաղը Ադրբեջանի տարածքն է, իսկ ռուս խաղաղապահներն այնտեղ տեղակայվել են ժամանակավոր։

«Ողջ Ղարաբաղը Ադրբեջանի ինքնիշխան տարածք է, միջազգային հանրությունը ճանաչում է Ադրբեջանի տարածքային ամբողջականությունը և ինքնիշխանությունը», - ասել է նա, հավելելով` ռուս խաղաղապահները տեղակայվել են Ադրբեջանի մաս կազմող Ղարաբաղի շրջանի որոշակի հատվածներում` նոյեմբերի 10-ի հայտարարությանը համապատասխան:

Նախագահ Ալիևի խորհրդականը նշել է, որ եռակողմ այդ հայտարարությունը սահմանել է խաղաղապահ ուժերի տեղակայման քաղաքական և որոշ չափով իրավական շրջանակները։

«Ինչ վերաբերում է ռուս խաղաղապահների մանդատի շուրջ հավելյալ համաձայնություններին ու հավելյալ իրավական մեխանիզմներին, ապա կողմերի միջև այդ հարցի վերաբերյալ նախնական շփումներ եղել են, և որոշակի քննարկումներ դեռ շարունակվում են», - ասել է նա:

Պաշտոնական Երևանն էլ օրեր առաջ արձանագրեց, թե Բաքուն մինչ օրս ռուս խաղաղապահների տեղակայման մանդատը չի ստորագրել, և լայնածավալ հակաքարոզչություն է իրականացնում նրանց դեմ: Ռուս խաղաղապահների մանդատը չհաստատելը կարող է երկու հեռահար նպատակ ունենալ։ Կամ Ադրբեջանը հող է նախապատրաստում խաղաղապահների տեղակայումը կասկածի տակ դնելու և Արցախից նրանց քշելու համար, կամ էլ, ինն ավելի հավանական է, փորձում է ՌԴ-ի համար խնդիրներ ստեղծելով՝ նոր զիջումներ կորզել հօգուտ իրեն։ Միջազգային ճգնաժամային խմբի տվյալներով, Ադրբեջանը, մասնավորապես, ցանկանում է, որ ՌԴ-ն հստակ հայտարարի, թե իր խաղաղապահներին տեղակայել է Ադրբեջանի տարածքում՝ այդկերպ ճանաչելով Արցախի նկատմամբ Ադրբեջանի նկրտումները։ Թերևս, դա էր պատճառը, որ Ադրբեջանում լայն հիստերիա էր սկսվել, երբ ՌԴ ՊՆ կայքում հայտնվել էր «Լեռնային Ղարաբաղի Հանրապետություն» ձևակերպումը։

Արտաշես Սարգսյան