Առաջադրվելու եմ, ունենք նաեւ որոշում, թե, որ ուժով եմ առաջադրվելու. Կապանի քաղաքապետ Գեւորգ Փարսյանը փակագծեր է բացում
ՔԱՂԱՔԱԿԱՆՈՒԹՅՈՒՆ
Կառավարության որոշմամբ Սյունիքի մարզի Կապան քաղաքում նոյեմբերի 14-ին տեղի են ունենալու հերթական ընտրությունները, ինչը գործող քաղաքապետ, 44-օրյա պատերազմի ընթացքում ահռելի թիկունքային աշխատանքներ կատարած Գեւորգ Փարսյանի գնահատմամբ արդեն իսկ միտումնավոր խախտում է: Մասնավորապես «Իրավունքի» հետ զրույցում քաղաքապետը փաստեց.
-Կապանում «Ընտրական օրենսգրքի» համաձայն պետք է ավագանինների լիազորությունների ավարտից հետո` երեքշաբաթյան ժամկետում որոշում կայացվեր արտահերթ ընտրություններ անցկացնլու մասին: Որից հետո ԿԸՀ-ն պետք է որոշեր արտահերթ ընտրությունների անցկացման օրը, բայց կառավարությունը առաջնորդվեց ՏԻՄ օրենքով: Ըստ այդմ 20-օրյա ժամկետում որոշում կայացվեց հերթական ընտրություններ անցկացնելու վերաբերյալ, որը իմ գնահատմամբ իրավական առումով խախտում է: Այսինքն Կառավարությունը պետք է առաջնորդվեր «Ընտրական օրենսգրքով», այլ ոչ թե ՏԻՄ օրենքով, քանի «Ընտրական օրենսգիրքը» շատ ավելի բարձրագույն իրավական ուժ ունի, քան ՏԻՄ օրենքը:
-Այստեղ միտում տեսնո՞ւմ եք պարոն Փարսյան:
-Իհարկե տեսնում եմ, արտահերթ ընտրությունները պետք է նշանակվեին հոկտեմբերի 17, բացի այդ էլ արտահերթ ընտրությունների քարոզարշավը տեւում է տասնհինգ օր: Իսկ ահա հերթական ընտրությունների քարոզարշավը տեւում է 25 օր: Այսինքն Կառավարությունը միտումնավոր որոշում է կայացրել հերթական ընտրություններ անցկացնելու, որպեսզի երկարատեւ քարոզարշավի ընթացքում իրենց ցանկալի արդյունքները գրանցեն:
-Պարոն Փարսյան, Դուք ինքներդ առաջադրվելո՞ւ եք եւ, եթե այո, ապա ո՞ր ուժով:
-Առաջադրվելու եմ, ունենք նաեւ որոշում, թե, որ ուժով եմ առաջադրվելու, բայց դրա վերաբերյալ կխոսեմ առաջիկայում:
Մեր առաջնահերթ խնդիրը եղել է եւ մնալու է անվտանգության հարցը: Կան իհարկե նաեւ այլ բազմաբնույթ եւ բազմազան խնդիրներ, որոնց ինչպես մինչ այս պահը, այնպես էլ հետագայում հատ առ հատ անդրադառնալու ենք:
-Պարոն Փարսյան, օգտվելով առիթից կխնդրեինք նաեւ անդրադառնալ օրեր առաջ ադրբեջանցիների կողմից փակված ճանապարհատվածին: Ի՞նչ իրավիճակ է այդ հատվածում:
-Ճանապարհը բացելուց հետո որեւիցէ խնդիր չի արձանագրվել, մեր սահմանապահները եւ ռուս խաղաղապահները երաշխավորում են ճանապարհի անվտանգ երեւեկությունը:
