Ադրբեջանցիները վնասում են սահմանամերձ գյուղերի բնակիչներին, իսկ իշխանությունը չի արձագանքում

Ադրբեջանցիները շարունակում են նյութական և հոգեբանական վնասներ հասցնել սահմանամերձ բնակավայրերի բնակիչներին, իսկ Հայաստանի իշխանություններն ասես քնած են էշի ականջում։ ՀՀ միակ արդյունավետ աշխատող պաշտոնյան՝ Մարդու իրավունքների պաշտպան Արման Թաթոյանը երկու դեպք է ներկայացրել վերջին օրերին։ Ըստ ՄԻՊ-ի՝ Գեղարքունիքում ադրբեջանական զինծառայողների գցած հրդեհներն այրում են ոչ միայն արոտավայրերն ու խոտհարքները, այլ նաև խոտը, որ մարդիկ չարչարանքով հնձել, պաշարել են ձմեռվա համար։

 

 

Մեկ ալ դեպք էլ, ըստ Թաթոյանի, տեղի է ունեցել դեռ օգոստոսի 16-ին։ 8 միլիոն դրամ վարկով գնած խոշոր եղջերավոր կենդանիների մեծ մասը Վայոց ձորում ադրբեջանական զինծառայողները հափշտակել ու չեն վերադարձել։ Դեպքը տեղի է ունեցել Վայոց ձորի մարզի Սերս գյուղի «Գոգի լեռ» կոչվող սարատեղում արածող 110 խոշոր եղջերավոր կենդանիներից 80-ը մոտեցել են ադրբեջանական դիրքին, որից 75-ը զինծառայողները հափշտակել են ու չեն վերադարձվել։ Տուժածները պաշտպանին տեղեկացրել են, որ իրենք մոտ 800-900 մ հեռավորությունից նկատել են, թե ինչպես են ադրբեջանական 3 զինծառայող դուրս գալիս իրենց խրամատից և մոտենում կենդանիներին: Այդ ընթացքում նրանք հեռվից շարունակել են հետևել ադրբեջանական զինծառայողների արարքին, որոնցից մեկը մոտ 300 մ առաջացել է և ձորակից քշել, բարձրացրել է կենդանիներին, որից հետո արդեն երեքով տարել են կենդանիներին:

 

Քաղաքացիների տեղեկացմամբ՝ դիմել են ՀՀ Վայոց ձորի մարզպետարան, համայնքի ղեկավարին, ՀՀ սահմանապահ զորքերին և բանակային կորպուս, սակայն առայժմ ոչ ոք չի փոխհատուցել նրանց կորուստները։ Այս ամենը վկայում է, որ Ադրբեջանը հստակ խնդիր է դրել իր առջև՝ ահաբեկել հայ գյուղացիներին, դժոխքի վերածել նրանց կյանքը, ստիպել, որ հեռանան։ Մինչդեռ խրոխտ հայտարարություններով աչքի ընկնող բարձրաստիճան պաշտոնյաները մատը մատին չեն տալիս ադրբեջանցու հետ դեմ-հանդիման մնացած մարդկանց կյանքը թեթևացնելու, նրանց անվտանգությունն ապահովելու համար։