Խաղաղապահներն Արցախի Վանք գյուղում շարժական արտագնա ընդունարան են տեղադրել

Արցախում ռուս խաղաղապահներն առաջին անգամ շարժական արտագնա ընդունարան են կազմակերպել Մարտակերտի շրջանի հեռավոր գյուղերում։

Մասնավորապես, Վանք գյուղի շրջանային հիվանդանոցում քաղաքացիների ընդունելության շարժական կետ է տեղակայվել, որտեղ գործում է անհայտ կորած զինծառայողների որոնման, մարդասիրական օգնություն ցուցաբերելու, աշխատանքի տեղավորման աջակցության և այլ խնդրահարույց թեմաներով տեղեկությունների հավաքագրման «թեժ գիծ»:

Քաղաքացիների ընդունելության կետ է դիմել ավելի քան 800 մարդ։ Այդ թվում՝ ավելի քան 400 դիմում ստացվել է «թեժ գծով»։

«Խաղաղապահ զորախմբի հրամանատարությունը որոշում է կայացրել Վանք գյուղ առաջին անգամ արտագնա հանրային ընդունարան ուղարկելու մասին, քանի որ շատ քաղաքացիներ հնարավորություն չունեն գալ Ստեփանակերտ, որտեղ տեղակայված է հանրային ընդունարանը»,-ասել է ռուսական խաղաղապահ զորախմբի ներկայացուցիչ Դմիտրի Տուսիդին:

Ասվում է, որ նշված հարցերով օգնության համար կարող են դիմել բոլոր ցանկացողները։

Բացի այդ, ռուսական խաղաղապահ զորախմբի բժշկական ջոկատի ռազմական բժիշկները տեղի հիվանդանոցում բժշկական ակցիայի շրջանակներում խորհրդատվական ընդունելություն են անցկացրել և որակյալ բժշկական օգնություն են ցուցաբերել Վանք բնակավայրի 150 բնակիչների: Աշխատել են սրտաբանը, ակնաբույժը, քիթ-կոկորդ-ականջաբանը և նյարդաբանը։

«Տեղի բնակչությունը մեծ ուրախությամբ է գալիս խորհրդատվության, քանի որ այս բնակավայրում բժշկական կազմ չկա։ Դիմում են երիտասարդ զույգեր, երիտասարդ կանայք՝ իրենց փոքր երեխաների հետ։ Մանկաբուժական օգնությունն այստեղ ևս բացակայում է», - ասել է ռազմական բժիշկ Մաքսիմ Կարավաևը։

Դիմումներին զուգահեռ մարդասիրական արձագանքման կենտրոնի սպաները բազմազավակ ընտանիքներից և հարկադիր տեղահանվածներից ավելի քան 200 մարդու ապահովել են դեղորայքով, պարենամթերքով, առաջին անհրաժեշտության պարագաներով, տաք իրերով և մանկական խաղալիքներով՝ շուրջ 5 տոննա ընդհանուր քաշով։