Հայկ Խալաթյան. Փաշինյանի «ծխաքողարկում»-ը Բաքվին նոր զիջումներից առաջ
ՀԱՍԱՐԱԿՈՒԹՅՈՒՆ
eadaily.com-ը գրում է, որ Հայաստանի և Ադրբեջանի սահմանին և ղարաբաղյան հակամարտության գոտում պարբերական միջադեպերի ֆոնին ՀԱՊԿ գլխավոր քարտուղար Ստանիսլավ Զասը այցելել է Հայաստան, որի ընթացքում հանդիպել է հանրապետության բարձրագույն ղեկավարության հետ, ինչպես նաև այցելել է հայ-ադրբեջանական սահմանին տեղակայված դիրքերի մարտական գործողությունների գոտի: Բացի այդ, ՌԴ պաշտպանության նախարար Սերգեյ Շոյգուի հրավերով Մոսկվա է մեկնել նրա հայ գործընկեր Արշակ Կարապետյանը: Հայ զորավարի այցի ընթացքում քննարկվել է իրավիճակը տարածաշրջանում և ռազմական ոլորտում հայ-ռուսական համագործակցությունը: Իսկ հինգշաբթի՝ օգոստոսի 12 -ին, Հայաստանի վարչապետ Նիկոլ Փաշինյանը կրկին առաջարկել է Ադրբեջանին վերսկսել բանակցությունները ԵԱՀԿ Մինսկի խմբի հովանու ներքո:
Իշխող կուսակցության ներկայացուցիչների պարբերաբար հնչող խոսակցությունները, որ ՀՀ իշխանությունները մտադիր են Բաքվին վերադարձնել նախկին Ադրբեջանական ԽՍՀ անկլավները, և Տավուշի հայ-ադրբեջանական սահմանին սկսված ռուս սահմանապահների տեղակայման նախապատրաստական աշխատանքների ֆոնին Փաշինյանի և նրա թիմի անդամների վերջին հայտարարությունները ամրապնդում են այն համոզմունքը, որ այս ամենն արվում է միայն սահմանազատման վերաբերյալ ապագա համաձայնագրի ստորագրման դեպքում հասարակությանը հանգստացնելու համար, մի տեսակ «ծխաքողարկում» է: Այն, որ այս պայմանագիրը կստորագրվի մոտ ապագայում վկայում է, մի կողմից, Ռուսաստանի ԱԳՆ հայտարարությունը հայ-ադրբեջանական սահմանի երկայնքով ռուս սահմանապահների տեղակայման խնդրահարույց բնույթի մասին, իսկ մյուս կողմից ռուս սահմանապահներին տեղավորելու համար ենթակառուցվածքների կառուցումը, որը սկսվել է Տավուշում:
Ռուսական կողմի տրամաբանությունը պարզ է. Մոսկվան շահագրգռված է ոչ միայն տարածաշրջանում խաղաղության պահպանմամբ, այլ նաև Հայաստանում և Ադրբեջանում իր ազդեցության պահպանմամբ: Հետևաբար, Ռուսաստանի իշխանությունները կարծում են, որ կապի արգելափակումն ու սահմանազատումը կվերացնի լարվածությունը սահմանին և Մոսկվային կազատի Երևանի նկատմամբ դաշնակցային պարտավորությունների և Բաքվի հետ հարաբերությունների միջև ցավոտ ընտրություն կատարելու անհրաժեշտությունից: Իսկ Հայաստանի իշխանությունների իրենց շահերն ու սահմանները պաշտպանելու անկարողության ֆոնին, Մոսկվան հաստատ ինքն էլ չի սրի հարաբերությունները Բաքվի հետ: Ի վերջո, եթե Հայաստանի ղեկավարն իր քաղաքացիներին ասում է, որ մտադիր չէ «պայքարել Սև լճի 30% -ի համար», ապա Ռուսաստանը առավել ևս դա չի անի: Բացի այդ, Փաշինյանի հունիսյան ընտրություններում տարած հաղթանակը, երբ նախապես հայտարարել էր Բաքվին լուրջ զիջումների գնալու պատրաստակամության մասին, հեշտացնում է Մոսկվայի գործը. այժմ անհրաժեշտ է ընդհանուր լեզու գտնել միայն Բաքվի հետ, որը, սակայն, օգտագործելով Թուրքիայի աջակցություն, փորձում է ստանալ առավելագույնը և վերջնականապես փակել Ղարաբաղի հարցը: Սակայն դրան համաձայն չէ ռուսական կողմը, որը ցանկանում է հասնել երկարաժամկետ քաղաքական կարգավորման և որոշել Արցախի վերջնական կարգավիճակը, որտեղ, ըստ էության, տեղակայված է նրա խաղաղապահ զորախումբը, և որը հետագայում կարող է դառնալ լիարժեք հենակետ:
Նյութը հրապարակման պատրաստեց Կամո Խաչիկյանը
