Ադրբեջանը շարունակում է իր վերջին 20 տարվա քաղաքականությունը

Վերջերս Ադրբեջանի նախագահը հարցազրույց էր տվել CNN Turk-ին։

 

Այս թեմայով զրուցել ենք քաղաքագետ Սուրեն Պետրոսյանի հետ։

 

Հարցին, թե ո՞րն էր Ալիևի հիմնական ասելիքը, քաղաքագետը պատասխանել է․ «Ադրբեջանի հռետորաբանության ու վարած քաղաքականության մեջ ոչ մի բովանդակային, խորքային փոփոխություն չկա, նրանք շարունակում են իրենց վերջին 20 տարվա քաղաքականությունը, բայց արդեն՝ բաղադրիչների հստակեցմամբ: Մեզ թվում է, թե այս պահին փոփոխվել է նրանց քաղաքականությունը, բայց ոչ: Ժամանակին, երբ նրանք ասում էին, թե Սյունիքը, Սևանը, Երևանն իրենցն են, մենք ծիծաղում էինք, ասում էինք՝ ոչխար են, զառանցում են, բայց վերջին իրադարձությունները ցույց տվեցին, որ Ադրբեջանը հետևողականորեն կյանքի է կոչում իր ծրագրերը՝ Թուրքիայի հետ համատեղ: Հիմա էլ հարաբերությունները կարգավորելու համար առաջարկում են Հայաստանին ճանաչել Ադրբեջանի տարածքային ամբողջականությունը՝ Արցախը ճանաչելով Ադրբեջանի մաս, ցեղասպանության օրակարգից հրաժարում և անուղղակի կամ ուղղակի կերպով Կարսի պայմանագրի ճանաչում: Սա եղել է թուրք-ադրբեջանական տանդեմի անփոփոխ ու մշտական ծրագիրը: Նույնիսկ Սյունիքի միջանցքի գաղափարը նոր չէ: ԽՍՀՄ-ի ժամանակ դեռ Ադրբեջանի ղեկավարը մշտապես դիմել է Կարեն Դեմիրճյանին և խնդրել միջանցք տալ: Հետևաբար, որևէ նորություն չկա` այդ մարդիկ իրականացնում են ռազմավարական ծրագիր»։

 

Հարցին, թե հայկական կողմը արդյո՞ք պաշտոնական մակարդակով պետք է պատասխաներ Ալիևի հայտարարություններին, Սուրեն Պետրոսյանը ասել է․ «Ոչ թե պետք է արձագանքեին, այլ պարտավոր էին արձագանքել»։