Թաղավարդն ու Կարմիր Շուկան կապահովվեն ջրով․ խաղաղապահները հետևում են աշխատանքներին
ՀԱՍԱՐԱԿՈՒԹՅՈՒՆ
Լեռնային Ղարաբաղում շփման գծի մոտակայքում ռուս խաղաղապահներն ապահովել են քաղաքացիական մասնագետների անվտանգությունը 20 կմ ջրագծի անցկացման ինժեներական աշխատանքներ կատարելիս։ Տեղեկությունը հայտնում է Ռուսաստանի պաշտպանական գերատեսչությունը։
Տեղի բնակիչները օգնության համար դիմել են Մարդասիրական արձագանքման կենտրոնին, քանի որ ջրամատակարարման մոտակա կայանը սահմանազատման գծի մոտ է գտնվում:
Հեռավոր Թաղավարդ գյուղի ջրատարի վրա աշխատանքներ են իրականացվում 2021 թ․-ի հունիսի 11-ից։ Մեկնարկային-կարգավորման աշխատանքներից և 20 կմ երկարությամբ ջրագծի գործարկումից հետո Թաղավարդի և Կարմիր Շուկայի բնակիչները կապահովվեն խմելու ջրով:
«Ներկայումս անվտանգության ապահովման միջոցառումներ են իրականացվում Թաղավարդ բնակավայրի ջրատարի վրա պրոֆիլակտիկ աշխատանքների ընթացքում: Այդ ջրատարն անցնում է սահմանազատման գծի երկայնքով, ինչի պատճառով էլ անհրաժեշտ է խաղաղապահ ուժերի ներկայությունը»,-ասել է ռուսական խաղաղապահ զորակազմի ներկայացուցիչ Ալեքսեյ Կոլեսնիկովը։
Հիշեցնենք` 2020թ.–ի սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։
2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվեց Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորակազմը տեղակայվել է 5 տարի ժամկետով, որից հետո այդ ժամանակահատվածը մեխանիկորեն կերկարաձգվի ևս 5 տարով, եթե կողմերից որևէ մեկը ժամկետի ավարտից 6 ամիս առաջ չհայտարարի տվյալ դրույթի կիրառումը դադարեցնելու մտադրության մասին:
