Հայաստանին ուժով համաձայնագիր են պարտադրում

Ռուսաստանի աջակցությամբ երեկ ձեռքբերված հրադադարի համաձայնությունից հետո Ադրբեջանն այսօր կրկին շարունակում է խախտել հրադադարի ռեժիմը Գեղարքունիքի հատվածում։ 

Հիշեցնենք, երեկ կայացած բախումների հետևանքով հայկական կողմը երեք զոհ և չորս վիրավոր ունի։ Իսկ այսօր արդեն Ադրբեջանը շարունակել է կրակ բացել հայ-ադրբեջանական սահմանի Գեղարքունիքի հատվածում տեղակայված հայկական դիրքերի ուղղությամբ։ Հայաստանի Պաշտպանության նախարարության փոխանցմամբ, ծավալվել է կարճատև փոխհրաձգություն, հայ դիրքապահների գործողություններից հետո հակառակորդի կրակը լռեցվել է։ Սադրանքների հետևանքով հրազենային վիրավորում է ստացել ՀՀ ԶՈՒ մեկ զինծառայող։ 

Ադրբեջանը չի էլ թաքցնում, որ նպատակը Հայաստանին սահմանազատում պարտադրելն է։ Ադրբեջանի ՊՆ-ն երեկ բառացի է ասել իր հաղորդագրության մեջ։ Ոչ պակաս տարօրինակ էր ռուսական կողմի հայտարարությունը։ «Ռուսաստանը հույս ունի, որ Հայաստանի և Ադրբեջանի միջև սահմանի սահմանազատման շուրջ բանակցությունները շուտափույթ կմեկնարկեն և պատրաստ է օգնություն ցուցաբերել»,- ասել է ՌԴ ԱԳՆ պաշտոնական ներկայացուցիչ Մարիա Զախարովան: 

Հայկական կողմը, սակայն, բառ անգամ չի ասել իրեն պարտադրվող օրակարգի մասին։ Բացառությունը, թերևս, ԱԳՆ հայտարարությունն էր, թե «Ադրբեջանի կողմից Հայաստանի տարածքային ամբողջականության դեմ ուժի կիրառմանն ի պատասխան Հայաստանի Հանրապետությունը գործի կդնի միջազգային իրավունքով վերապահված իր ռազմաքաղաքական ողջ գործիքակազմը»։ Որևէ գործիքակազմ, այդ թվում՝ ՄԱԿ ԱԽ-ին, Ֆրանսիային և ԱՄՆ-ին դիմելու ուղղությամբ, չի օգտագործվել։ Իշխանական պատգամավոր Հակոբ Ասլանյանն է «Հրապարակ» թերթի հետ զրույցում սենսացիոն հայտարարություն արել, որ Գեղարքունիքի հատվածում հայ-ադրբեջանական սահմանային լարվածության շահագրգիռ կողմերից են Ռուսաստանն ու Թուրքիան։

«Ռուսաստանն ամեն կերպ փորձում է Հայաստանի վրա ճնշում բանեցնել, որովհետև ՌԴ-ին ձեռ է տալիս Սյունիքի միջանցքը։ Ուզում է դրանով կտրել Հայաստանը Եվրոպայից, որովհետև Ռուսաստանն ու Թուրքիան դեմ են, որ Հայաստանը միջազգային տարանցիկ ճանապարհ դառնա՝ Իրանով, Հնդկաստանով, Չինաստանով գնացող ճանապարհը»,- ասել է նա։

ԱԺ ընդդիմադիր «Պատիվ ունեմ» դաշինքի պատգամավոր Տիգրան Աբրահամյանի համար տարօրինակ է ՀՀ իշխանությունների պահվածքը։ «Հայաստանի որևէ բարձրաստիճան պաշտոնյա այդպես էլ չպարզաբանեց, թե ինչ բանակցություններ էին նախատեսված Մոսկվայում, ինչի մասին երեկ պաշտոնական հաղորդագրությամբ տեղեկացրեց ՀՀ ՊՆ-ն և ինչի շուրջ էր այդ հանդիպումը։ Ավելին, երեկ Մոսկվայի նախաձեռնությամբ հաստատված հրադադարի պայմանների կամ ընդհանրապես մանրամասների մասին այդպես էլ ոչինչ չհաղորդվեց»,- ընդգծել է նա։


Արտակ Գալյան