Հովիկ Աբրահամյանը ասել է, թե ինչ է անելու 2017-ին և դրանից հետո

Tert.am-ը զրուցել է ՀՀ նախկին վարչապետ Հովիկ Աբրահամյանի հետ:

Նախկին վարչապետը հայտարարել է, որ ջերմ ընկերական հարաբերություններ ունի գործող վարչապետ Կարեն Կարապետյանի հետ: Նաեւ պատասխանելով հարցին, որ պաշտոնանկությունից հետո ակտիվ չէ, ասել է. «Իմ շատ ակտիվ լինելը միգուցե այլ կերպ կընկալվեր, միգուցե նաեւ ինչ-որ տեղ խանգարեր։ Իսկ հարցեր քննարկելու, հարկ եղած դեպքում օժանդակելու համար հատկապես հիմա հարկ չկա դա հրապարակային անել. մենք ունենք եւ՛ ընկերական շփումների, եւ՛ այժմ արդեն կուսակցության գրասենյակում քննարկումների հարթակները»։

Գնահատելով Կարեն Կարապետյանի կառավարության աշխատանքը, Հովիկ Աբրահամյանն ասել է. «Վարչապետն ու կառավարությունը բավականին հաջող են սկսել։ Ունեն լավ տրամադրվածություն, գործելու լայն ազատություն եւ բավականին ուժեղ քաղաքական հենարան իրենց թիկունքում։ Հաջողություն մաղթենք կառավարությանը, որովհետեւ ամեն ինչից զատ օբյեկտիվ հաջողության կարիք էլ կա համաշխարհային տնտեսության բավականին փոփոխական ներկա պայմաններում»։

Հարցին՝ 2017 թ. ԱԺ ընտրություններին Ձեզ ՀՀԿ շտաբը ղեկավարելու առաջարկ եղե՞լ է, որտե՞ղ եք Ձեզ տեսնում 2017-ի ընտրություններից հետո, նախկին վարչապետը պատասխանել է. «2017թ. ԱԺ ընտրությունների բուն կազմակերպչական աշխատանքները դեռ կուսակցությունում չեն սկսվել։ Իհարկե, ՀՀԿ 15-րդ համագումարը, հատկապես, Նախագահի ամփոփիչ ելույթը տվեցին այն գաղափարական հստակ գիծը, որով մենք գալիք ընտրություններում ներկայանալու ենք մեր հասարակությանը եւ քվե ենք հայցելու։ Շուտով կսկսվի նաեւ կազմակերպչական աշխատանքների համակարգման փուլը, եւ կուսակցության յուրաքանչյուր անդամ կստանա այդ մեծ գործընթացում պատասխանատվության սեփական հատվածը, բայց բոլորը միասին, իհարկե, կգործեն որպես մեկ միասնական թիմ։ Իսկ 2017 թվականից հետո ինձ տեսնում եմ նույն դերում, որում տեսել եմ միշտ՝ հնարավորություններիս ու փորձիս սահմաններում ծառայել Հայրենիքին։ Այստեղ դա իրականացնելու ձեւը չէ կարևոր, այլ բովանդակությունն ու նվիրվածությունը»։

Մանրամասները՝ սկզբնաղբյուր կայքում: