Դատարանը վերադարձրել է Թագուհի Թովմասյանի հայցը ընդդեմ Լենա Նազարյանի
ՔԱՂԱՔԱԿԱՆՈՒԹՅՈՒՆ
ԱԺ պատգամավոր Թագուհի Թովմասյանի դատական հայցն ընդդեմ ԱԺ փոխնախագահ Լենա Նազարյանի հետ է վերադարձվել: Այս մասին տեղեկանում ենք datalex.am-ից։
Դատարանը վերադարձրել է դիմումը այն պատճառաբանությամբ, որ Թովմասյանը լիարժեք չի վճարել պետական տուրքերը։ Մասնավորապես՝ նա ներկայացրել էր մեկ ոչ գույքային պահանջ, որի համար պետք է վճարեր 4000 դրամ պետական տուրք, 1 մլն դրամ գումարի բռնագանձման պահանջ, որի համար պետք է վճարեր 20 հազար դրամ պետական տուրք: Այսինքն՝ ընդհանուր առմամբ հայցվորը պետք է վճարեր 24 հազար դրամ պետական տուրքի գումար, այնինչ նա վճարել է 8000 դրամ:
Միաժամանակ դատարանն ընդգծում է, որ մատնանշված թերությունները վերացվելու և հայցադիմումը կրկին դատարան ներկայացնելու պարագայում անհրաժեշտ է հայցադիմումի օրինակը և դրան կից փաստաթղթերի պատճենները կրկին ուղարկել գործին մասնակցող անձին և այդ փաստը հավաստող ապացույցները կցել կրկին ներկայացված հայցադիմումին: Որոշումը ստանալուց հետո եռօրյա ժամկետում հայցադիմումի թերությունները վերացվելու և այն դատարան կրկին ներկայացվելու դեպքում հայցադիմումը համարվում է առաջին ատյանի դատարան ներկայացված այն սկզբնապես ներկայացնելու օրը:
Հիշեցնենք, որ հունիսի սկզբին խորհրդարանում ելույթից հետո Լենա Նազարյանը, մոռանալով անջատել խոսափողը, Թագուհի Թովմասյանին «իդիոտկա» էր անվանել։ Վերջինս պահանջել էր Նազարյանից հրապարակավ ներողություն խնդրել, ինչին Լենա Նազարյանը հայտնել էր, որ չի պատրաստվում։
