ԵՄ-ն հետաքրքրված է Հայաստանով
ՔԱՂԱՔԱԿԱՆՈՒԹՅՈՒՆ
Վերջերս հայտնի դարձավ, որ ԵՄ-ն 2,6 մլրդ եվրոյի աջակցություն է տրամադրում Հայաստանին՝ առաջնահերթ հատուկ ծրագրերի իրականացման համար:
Այս թեմայով զրուցել ենք քաղաքագետ Անդրեաս Ղուկասյանի հետ։
Հարցին, թե ինչպե՞ս եք գնահատում ԵՄ-ի նման մեծ ծավալի հանձնառությունը քաղաքագետը պատասխանել է․ «Միայն դրական կարելի է գնահատել այդ նախաձեռնությունը: Ցավալի է, որ ընտրությունների քարոզարշավի ժամանակ հնչում էին մտքեր, որ Հայաստանը ոչ մեկին պետք չէ, ոչ մեկը պատրաստ չէ Հայաստանին օժանդակություն ցուցաբերել: Այս ծրագրերի վերաբերյալ ԵՄ-ի աջակցությունը ցույց է տալիս, որ նման հայտարարություններն ակնհայտ կեղծիք էին: ԵՄ-ն հետաքրքրված է Հայաստանով, պատրաստ է օժանդակել, այդ օժանդակությունը կարող էր ավելի մեծ լինել, ինչը արդեն կախված էր Հայաստանի իշխանությունների դիրքորոշումից»։
Հարցին, թե քաղաքագետն ինչպե՞ս է գնահատում Նիկոլ Փաշինյանի այցը Մոսկվա և Պուտինի շնորհավորանքը Անդրեաս Ղուկասյանը պատասխանել է․ «Ռուսաստանն ունի օրակարգ եռակողմ ձևաչափը՝ Ռուսաստան-Հայաստան-Ադրբեջան, զարգացնելու հետ կապված, և Պուտինի շնորհավորանքը և խոսքը ուղղված էր այդ օրակարգին: Այն ենթադրում է, որ Հայաստանի ղեկավարությունը պատրաստ է Ադրբեջանի ղեկավարության հեր պայմանագիր կնքել՝ թողնելով Արցախը Ադրբեջանի կազմում և թողնելով արցախահայությունը որպես ազգային փոքրամասնություն Ադրբեջանի կազմում՝ ՌԴ պաշտպանության ներքո: Այդ առումով Պուտինը նշեց, որ հայերի արժանապատվության համար ցավալի որոշումներ են սպասվում և այդ որոշումները պետք է իրականացնի Նիկոլ Փաշինյանը»:
Սոնա Գիշյան
