Ի՞նչ կորոշի սահմանադրական դատարանը

Հայաստանի Սահմանադրական դատարանը առաջիկայում քննելու է արտահերթ խորհրդարանական ընտրությունների արդյունքների չեղարկման վերաբերյալ չորս քաղաքական ուժերի դիմումները։ ՍԴ-ն միավորել է չորս դիմումները մեկ վարույթում, և արդեն հուլիսի 9-ից կսկսի բաց ընթացակարգով լսումները։ Ըստ ամենայնի, որոշումը կհրապարակի մինչև հուլիսի 17-ը, ինչից հետո, եթե ՍԴ-ն որոշում կայացնի հօգուտ Նիկոլ Փաշինյանի, Ազգային ժողովի առաջին նիստը տեղի կունենա հուլիսի 26-ին։ ՍԴ-ում զեկուցողը դատավոր Էդգար Շաթիրյանն է՝ Նիկոլ Փաշինյանի իշխանության կարկառուն ներկայացուցիչներից Ալեն Սիմոնյանի կուրսեցին։ Չար լեզուները պնդում են, որ հենց Ալեն Սիմոնյանն է եղել Շաթիրյանին ՍԴ դատավոր ընտրելու կնքահայրը։ Ի դեպ, ՍԴ-ն աշխատակարգային վերջին նիստում քննել է դատավորների ինքնաբացարկի միջնորդությունները և բոլորն էլ մերժել է։ Դատավոր Արևիկ Պետրոսյանը ինքնաբացարկի միջնորդություն է ներկայացրել ոչ անհայտ Վահե Գրիգորյանին։ Վերջինս էլ ինքնաբացարկի միջնորդություն է ներկայացրել Հրայր Թովմասյանին։

Վահե Գրիգորյանի ինքնաբացարկի միջնորդություն ներկայացրել էր նաև «Հայաստան» դաշինքը՝ պատճառաբանելով, որ մեկ այլ գործով Գրիգորյանը դատավարական հակառակորդ է եղել՝ հանդես գալով ընդդեմ Ռոբերտ Քոչարյանի, Սեյրան Օհանյանի, Արմեն Գևորգյանի։ Այդ երեք անձինք էլ «Հայաստան» դաշինքի առաջին տասնյակում են։ Ընդսմին, ՍԴ-ն հրաժարվել է բավարարել ինքնաբացարկի միջնորդությունները բավարարել, քանի որ 9 դատավորներից 6-ը պետք է կողմ քվեարկեին։ Թե ինչ հանգուցալուծում կունենա ՍԴ-ում դիմումների քննությունը, դժվար է ասել։ ՍԴ-ն մի քանի անգամ ապացուցել է իր անկախությունը, անկախ նրանից, թե Նիկոլ Փաշինյանն ինչպես էր փորձում վերաձևել և իրեն հաճո դարձնել դատական գլխավոր ատյանը։ Արդյո՞ք ՍԴ-ն այս անգամ էլ կմնա իր բարձրության վրա՝ լինելով օրենքի և օրինականության ջատագովը, թե՞ տուրք կտա իշխանության ճնշումներին։

Արթուր Իսահակյան