Մարգարիտա Սիմոնյանի գրասենյակը վարում է ադրբեջանական քարոզչություն
ՀԱՍԱՐԱԿՈՒԹՅՈՒՆ
infoteka24.ru-ն գրում է, որ ռուսական առաջատար լրատվական գործակալություններից մեկը՝ ՌԻԱ Նովոստին, ցույց է տվել պրոֆեսիոնալիզմի բացարձակ պակաս: Գործակալության կայքում հոդված է հրապարակվել այն մասին, որ լիբանանահայ Վիգեն Եվլեխճչյանը Բաքվում դատապարտվել է 20 տարվա ազատազրկման, և նրան անվանել է «լիբանանյան վարձկան»: Այսպիսով, ՌԻԱ Նովոստին կրկնել է ադրբեջանական քարոզչության այն թեզը, ըստ որի՝ հայ գերիները մեղադրվում են ահաբեկչության և վարձկանության մեջ:
ՌԻԱ Նովոստին կարող է տեղյակ չլինել այն մասին, որ Եվլեխճչյանը հայ է և Հայաստանի քաղաքացի, և հետևաբար չի կարող վարձկան լինել: Ըստ Բաքվի տրամաբանության՝ սփյուռքի բոլոր հայերը, ովքեր մեծամասամբ ունեն Հայաստանի քաղաքացիություն, և ովքեր շտապել են օգնել իրենց Հայրենիքին՝ վարձկաններ են: Եթե Հայաստանը կարողանար իրեն թույլ տալ վարձկաններ ունենալ, ապա հայկական կողմի զոհերն ակնհայտորեն ավելի քիչ կլինեին, ինչպես դա եղել է Սիրիայից վարձկաններ օգտագործած Ադրբեջանի դեպքում: Հիշեցնենք, որ այդ փաստը հաստատել է անգամ Մոսկվան՝ ի դեմս Սերգեյ Նարիշկինի:
Կարևոր է նշել նաև, որ Եվլեխճչյանը չի մասնակցել ռազմական գործողություններին և Արցախում 2020 թվականի աշնանը գերեվարվել է գրավված Շուշի քաղաքի խաղաղ բնակիչների հետ: Նա ոչ մի կապ չի ունեցել Հայաստանի և Արցախի զինված ուժերի հետ, այլ ընդամենը 2019 թվականին տեղափոխվել է Արցախ մշտական բնակության:
Այդ համատեքստում էլ ավելի զարմանալի է այն փաստը, որ այդ տեղեկատվական ռեսուրսը ղեկավարում է Մարգարիտա Սիմոնյանը, ով ամեն առիթով հիշում է ցեղասպանությունից փրկված իր նախնիներին: Այս դեպքում նա, ինչպես ոչ ոք, պետք է իմանար, թե ինչպես են հայերը հայտնվել Լիբանանում: Բայց Սիմոնյանի սկզբունքներին հավատարիմ մնալը, ավելի ճիշտ՝ նրա բացակայությունը այլևս գաղտնիք չէ: Նրա համար ավելի հեշտ է թշնամու զուռնայի տակ պարել և նյարդայնացնել Հայաստանին, որը չի ընդունել նրա ծախու էությունը:
Ավելի վաղ, ՏԱՍՍ գործակալությունն էր առանձնացել իր ադրբեջանամետ դիրքորոշմամբ՝ շնորհիվ իր գլխավոր տնօրենի տեղակալ Միխայիլ Գուսմանի, և ՌԻԱ Նովոստին դեռ կարող էր մրցել «օբյեկտիվ» լրատվության կոչման համար, բայց այս հրապարակումից հետո ՌԻԱ-ին կարելի է գրանցել նույն ցուցակում, որոնք են կողմնակալ և անպետք լրատվամիջոցները, իսկ Սիմոնյանին կարելի է դասել ձախողված քարոզիչների շարքում: Եվ վերջում ասենք հետևյալը. վաճառելով ձեր հայրենիքը՝ որքան էլ փող աշխատեք, միևնույն է ինքներդ էժանագին եք մնալու:
Նյութը հրապարակման պատրաստեց Կամո Խաչիկյանը
