Ընդդիմությունը տուրք չտվեց Փաշինյանի սադրանքին․ սյունյաց «արշավանքը» ձախողվեց

Խորհրդարանական արտահերթ ընտրություններում Նիկոլ Փաշինյանի համար աամենալուրջ խնդիրները կարող են և կառաջացնեն Սյունիքի մարզի բնակիչները։ Մեկ անգամ «սյունյաց ողջույնի» արժանացած Նիկոլ Փաշինյանը նախօրեին իր այցը Սյունիք իրականացրել է բացառապես մեկ նպատակով։ Հազարավոր համազգեստավոր և քաղաքացիական ոստիկաններին, շրջիկ ժեխին Սյունիք տանելով՝ նա փորձում էր տեղում լպիրշ և վիրավորական արտահայտություններով բախումներ հրահրել, սադրել մարզի ակտիվ և հեղինակավոր դեմքերին, կռիվ ստեղծել, որ ոստիկանության և ԱԱԾ-ի միջոցով ընտրությունների նախօրյակին ձերբակալի և մեկուսացնի առավել ակտիվ ընդդիմադիր ակտիվիստներին։ Այսինքն, քանդել կազմակերպչական կառույցները։

Սյունիքում, հիշեցնենք՝ համայնքապետերի զգալի մասը «Վերածնվող Հայաստան» կուսակցությանն են անդամակցել, բազմիցս հայտնել են իրենց անհամաձայնությունը գործող իշխանության հետ։ Շատերի վրա կեղծ քրեական գործեր են հարուցված, քանիցս բերման են ենթարկել, բայց որևէ անգամ չեն ծնկել կապիտուլյանտի առջև։ Իհարկե, այդ մարդկանց ունեցած ռեսուրսները, անձնական կապերն ու հեղինակությունը լրջորեն խաթարելու են Սյունիքում «Քաղաքացիական պայմանագրի» ընտրվելու շանսերը։

Առանց այն էլ, սահմանամերձ դարձած Սյունիքի բնակիչը, որին իշխանությունը մեն-մենակ է թողել թշնամու դեմ, ամեն ժամ ու ամեն րոպե «ողջույններ» է հղում Նիկոլ Փաշինյանի իշխանությանը։ Միգուցե, Փաշինյանին և իր խորհրդատուներին թվացել է, թե շատ խելոք են և այսկերպ կարող են լուծել Սյունիքի հարցը։ Այդուհանդերձ, ասպատակությունը ձախողվեց, որևէ միջադեպ Փաշինյանը չստացավ։ Մեր տեղեկություններով, ընդդիմադիրները որոշել են տուրք չտալ Փաշինյանի սադրանքներին և զսպել, առնվազն հունիսի 20-ին ցույց տալ, թե ինչի է ընդունակ սյունեցին, ինչ եռամատ կոմբինացիա է ցույց տալու ապիկար իշխանություններին։ Սյունիքում վիժեցվում է սադրանքը, վաղը կվիժեցվի փաշինյանական սադրիչների ընտրությունը։

Վարդան Բաբայան