Թուրքիան և Ադրբեջանը՝ Նիկոլ Փաշինյանի բնական դաշնակիցներ

Հայաստանում խորհրդարանական արտահերթ ընտրությունները դարձել են թուրքական և ադրբեջանական մամուլի առաջնային թեմաներից մեկը, և թշնամական երկրների քաղաքական շրջանակները անթաքույց հայտարարում են Նիկոլ Փաշինյանին իրենց աջակցության մասին։ Թուրքագետներն ահազանգում են, որ Թուրքիայում և Ադրբեջանում խիստ մտահոգ են Հայաստանում ազգային ուժերի՝ իշխանության գալու հեռանկարից, և ամեն կերպ փորձում են պահպանել Նիկոլ Փաշինյանի իշխանությունը։ Իհարկե, թշնամական կողմին ձեռք է տալիս, որ Հայաստանի ղեկին շարունակի մնալ մի իշխանություն, որին ահաբեկելով, ծաղրելով, նվաստացնելով կարող են նորանոր զիջումներ կորզել։

Իսկ ազգային խնդիրներով մտահոգ, ամուր և հայրենասեր նոր իշխանությունների պարագայում թշնամական կողմին չի հաջողվելու իրականացնել իր մտահղացումը։ Փաշինյանին, կարծես, Ալիևի և Էրդողանի այդ աջակցությունը դուր է գալիս։ Նա նույնիսկ չի կարողացել զսպել իրեն և կոչ է արել իր օրինակով գնահատել Ալիևի կողմից ցուցաբերված կառուցողական քայլը։ Իսկ այդ «կառուցողական քայլը», ըստ վարչապետի պաշոտանակատարի, ականապատ դաշտերի քարտեզների դիմաց ընդամենը 15 գերու ազատումն է։ Առաջիկայում, չի բացառվում, որ ռազմագերիների այլ խմբեր ևս ազատ արձակեն, իսկ այդ փաստը Նիկոլ Փաշինյանն օգտագործելու է իր քարոզարշավում։ Հարց է ծագում, եթե հնարավոր էր քարտեզների դիմաց ազատել գերիների մի խմբի, ինչո՞ւ են դա անում պատերազմի ավարտից յոթ ամիս անց՝ քարոզարշավի շրջանում։

Էդգար Հայրապետյան