Իսրայելի նոր վարչապետ է դարձել Նաֆթալի Բենեթը
ՄԻՋԱԶԳԱՅԻՆ
Կիրակի Իսրայելի խորհրդարանը ձայների մեծամասնությամբ հաստատել է կոալիցիոն կառավարության նոր կազմը՝ վերջ դնելով Բենյամին Նեթանյահուի 12-ամյա կառավարմանը։
Հաջորդ կառավարությունը կգլխավորի պաշտպանության նախկին նախարար, «Յամինա» կուսակցության առաջնորդ Նաֆթալի Բենեթը, որը նախօրեին Քնեսեթում (Իսրայելի խորհրդարանը) տեղի ունեցած արարողության ժամանակ երդում է տվել որպես Իսրայելի 13-րդ վարչապետ, հաղորդում է ՏԱՍՍ-ը։
«Ես՝ Նաֆթալի Բենեթս, որպես վարչապետ պարտավորվում եմ հավատարիմ մնալ Իսրայելին և երկրի օրենքներին, հավատարմորեն կատարել վարչապետի պարտականությունները և Քնեսեթի որոշումները»,- Քնեսեթի ամբիոնից ասել է Բենեթը։
Նոր կաբինետը ձևավորվել է «Յեշ աթիդ» կուսակցության ղեկավար Յաիր Լապիդի հետ կոալիցիայում։ Կողմերի պայմանավորվածության համաձայն՝ Բենեթը վարչապետ կլինի առաջիկա երկու տարիներին, ապա այդ պաշտոնը Լապիդին կզիջի երկու տարով՝ մինչև նոր խորհրդարանական ընտրությունները:
Իսրայելի 36-րդ կառավարությունում պաշտպանության նախարարությունը կգլխավորի Բենի Գանցը, որն այդ գերատեսչությունը ղեկավարում էր նաև Բենյամին Նեթանյահուի օրոք, արտաքին գործերի նախարարությունը կղեկավարի Յաիր Լապիդը, իսկ ՆԳՆ-ն՝ Բենեթի զինակից Այելետ Շաքեդը:
