Լավագույն բնական միջոցները զարկերակային բարձր ճնշման կարգավորման համար. 10 բաղադրատոմս

Զարկերակային գերճնշումը ներկայում ամենատարածված ու վտանգավոր հիվանդություններից մեկն է, որը մշտական վերահսկողության տակ չպահելու դեպքում կարող է դառնալ մի շարք լուրջ ախտաբանությունների զարգացման պատճառ։ Այս խնդիրը կարող է շատ երկար ժամանակ զարգանալ առանց լուրջ ախտանշանների՝ մնալով աննկատ ու կործանարար ազդեցություն ունենալով օրգանիզմի վրա։

Զարկերակային գերճնշման ախտորոշման դեպքում մասնագետները որպես կանոն նշանակում են արյան ճնշումը կարգավորող հատուկ դեղամիջոցներ, սակայն մասնագետները վստահ են, որ զարկերակային ճնշումը վերահսկողության տակ պահելու և ճնշման տատանումները կանխելու ամենակարևոր նախապայմանը սննդային սովորությունները կարգավորելն է, ինչպես նաև սննդակարգում ճնշման նվազմանը նպաստող մթերքի ու ըմպելիքների ներառելը։ Բացի այդ, կարելի է կիրառել նաև ճնշումը կարգավորող բնական դեղամիջոցներ, որոնք նույնքան արդյունավետ են, որքան դեղատնային միջոցները, սակայն ի տարբերություն դրանց չեն առաջացնում կողմնակի բարդություններ։ 

Ձեր ուշադրությանն ենք ներկայացնում մի քանի փորձված բաղադրատոմս, որոնք համարվում են զարկերակային ճնշումը կարգավորող լավագույն բնական միջոցները, ուստի նման խնդրի դեպքում դրանք դրանք կիրառելը կարող է շատ օգտակար լինել։ Նման բնական դեղամիջոցները կարող են հիանալի միջոց լինել ինչպես ճնշման տատանումների կանխարգելման համար, այնպես էլ անսպասելի բարձրացած ճնշումը նվազեցնելու համար, իսկ բնական բաղադրության շնորհիվ նաև հավելյալ օգուտ կտան օրգանիզմին։

• 1 ճաշի գդալ մասուրի չորացրած պտուղներին ավելացնել 2 բաժակ եռման ջուր, 10 րոպե դնել թույլ կրակին, այնուհետև թողնել հեղուկը սառչի։ Թուրմը քամել, քաղցրացնել 1 ճաշի գդալ մեղրով և ընդունել օրական 2-3 անգամ ¼ բաժակ։ Ըմպելիքը հարկավոր է պահել սառնարանում։
• 1 բաժակ մանրացրած սխտորին ավելացնել կես լիտր օղի և թրմել մութ ու տաք տեղում, այնուհետև ստացված թուրմն ընդունել օրական 3 անգամ սնվելուց առաջ մեկական ճաշի գդալ։
• 1 բաժակ լոռամիրգի թարմ հատապտուղները մսաղացով մանրացնել, այնուհետև ավելացնել նույն քանակությամբ մեղր և լավ խառնել։ Այս բուժիչ խառնուրդը հարկավոր է ընդունել օրական երեք անգամ սնվելուց 15-20 րոպե առաջ մեկական ճաշի գդալ։
• Քամել սևապտուղ արոսենու թարմ հատապտուղների հյութը և ընդունել օրական 3 անգամ սնվելուց կես ժամ առաջ ⅓ բաժակ։ 
• 2։2։1 հարաբերակցությամբ խառնել անանուխը, երիցուկն ու կատվախոտի արմատը, այնուհետև ստացված խառնուրդի 1 ճաշի գդալին ավելացնել մի բաժակ եռման ջուր, 1 ժամ թրմել թերմոսի մեջ և ընդունել ամեն օր ⅓ բաժակ։
• Կես բաժակ ճակնդեղի հյութին ավելացնել մի գդալ մեղր, լավ խառնել մինչև մեղրը լուծվի, այնուհետև ավելացնել կես բաժակ ջուր և ընդունել օրական 2 անգամ կես բաժակ։
• Խառնել հավասար քանակությամբ սևապտուղ արոսենու չորացրած հատապտուղներն ու ալոճենու պտուղները, այնուհետև ստացված խառնուրդի 1 ճաշի գդալին ավելացնել եռման ջուր և 8 ժամ թրմել թերմոսի մեջ։ Պատրաստի թուրմը քաղցրացնել մեղրով և խմել որպես թեյ։
• 2 ճաշի գդալ սև հաղարջի չորացրած հատապտուղներին ավելացնել 1 բաժակ տաք ջուր, դնել թույլ կրակին ու եռացնել 10 րոպե, որից հետո թրմել ևս մեկ ժամ։ Թուրմը քամել և ընդունել օրական 4 անգամ ¼ բաժակ։
• 1 ճաշի գդալ ալոճենու չորացրած հատապտուղներին և 1 ճաշի գդալ ազնվամորու չորացրած հատապտուղներին ավելացնել 2 բաժակ եռման ջուր, 1 ժամ թրմել թերմոսի մեջ, այնուհետև քամել և խմել օրվա ընթացքում երկու անգամ մեկական բաժակ։
• 1 ճաշի գդալ թարմ կամ սառեցված լոռամրգի հատապտուղներին ավելացնել նույն քանակությամբ շաքարավազ ու տրորել, այնուհետև ստացված խյուսին ավելացնել մի փոքր ջուր և խմել ստացված համեղ ըմպելիքը։ Կարելի է նաև այս խառնուրդն օգտագործել խյուսի տեսքով՝ համադրելով թեյի հետ։

Այս բնական միջոցները շատ արդյունավետ են և ճիշտ գործածության դեպքում կօգնեն մոռանալ զարկերակային ճնշման տատանումների մասին, սակայն հարկ է հիշել, որ ցանկացած բնական դեղամիջոց օգտագործելուց առաջ հարկավոր է անպայման խորհրդակցել բուժող բժշկի հետ, քանի որ ինքնաբուժությունը կարող է շատ վտանգավոր լինել ու էլ ավելի վատթարացնել հիվանդի վիճակը: Բացի այդ, միայն փորձառու մասնագետը կկարողանա հստակ ախտորոշել հիվանդությունն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ:

Նյութի աղբյուրը՝ aif.ru