Հուլիսի 1-ից Երևանում ՃՈ–ի փոխարեն կգործի նոր Պարեկային ծառայություն
ՀԱՍԱՐԱԿՈՒԹՅՈՒՆ
Մինչև 2021 թվականի հուլիսի 1-ը Երևանում կներդրվի նոր Պարեկային ծառայություն։ Դրան զուգահեռ նախատեսվում է լուծարել Ճանապարհային ոստիկանության ճանապարհապարեկային ծառայության 1-ին սպայական գումարտակը, որը սպասարկում է Երևան քաղաքը։
Այս փոփոխությունը նախատեսված է ՀՀ կառավարության 2020 թվականի ապրիլի 23-ին հաստատած՝ ոստիկանության բարեփոխումների ռազմավարությամբ ու դրանից բխող 2020-2022 թվականների գործողությունների ծրագրով։
Այս փոփոխության արդյունքում անհրաժեշտություն է առաջացել Ճանապարհային ոստիկանության մի շարք լիազորություններ փոխանցել նոր ստեղծվող պարեկային ծառայությանը։ Այդ գործառույթների թվում է նաև ճանապարհատրանսպորտային պատահարների հաշվառում իրականացնելը։
Հաշվի առնելով, այս հանգամանքը` ՀՀ կառավարությունն այսօրվա նիստում որոշում ընդունեց պատահարների հաշվառումը Պարեկային ծառայությանը պատվիրակելու մասին։
«Եթե ճանապարհատրանսպորտային պատահարների հետևանքով զոհվել կամ վիրավորվել են մարդիկ, ապա ճանապարհապարեկային ծառայության շարային ստորաբաժանման կամ պարեկային ծառայության ծառայողը պատահարի վայր ներկայանալուց և Հայաստանի Հանրապետության օրենսդրությամբ սահմանված կարգով միջոցներ ձեռնարկելուց հետո անմիջապես զեկուցում է համապատասխանաբար ճանապարհային ոստիկանության օպերատիվ կառավարման կենտրոն և ներկայացնում հաղորդում»,– ասված է որոշման մեջ։
Որոշումն ուժի մեջ է մտնում 2021 թվականի հուլիսի 1-ից։
