Մեր վարկանիշն աճում է. այսօր երրորդն ենք, բայց մեր հավակնություններն ավելի մեծ են. Արմեն Աշոտյան
ՔԱՂԱՔԱԿԱՆՈՒԹՅՈՒՆ
Ես սոցհարցումներին չեմ հավատում, մեր գիտեմ, որ մեր վարկանիշն աճում է, մենք առնվազն այսօր երրորդն ենք, ես դա ստույգ գիտեմ, բայց մեր հավակնություններն ավելի մեծ են: Այս մասին, այսօր՝ մայիսի 31-ին, մամուլի ասուլիսի ժամանակ նշեց ՀՀԿ փոխնախագահ Արմեն Աշոտյանը:
«Իհարկե ճտերին աշնան են հաշվում, իսկ ապագա հավաքականները, եւ իշխանափոխության կազմերը հաշվելու են ընտրությունների արդյունքում»,-ասաց նա:
Աշոտյանը համոզմունք հայտնեց, որ իրենց «Պատիվ ունեմ» դաշինքը լինելու է խորհրդարանում. «Իմ կուսակցությունն ունենալու է մանդատներ, ունենալու է խմբակցություն եւ լինելու է գալիք իշխանությունը ձեւավորող հենասյուներից մեկը, հիմնական գործոններից մեկը: Բոլորը գիտեն, որ մեր ցուցակում պատիվ ունեցող մարդիկ են, մեր թիմը լավագույններից է Հայաստանում:
Եթե Նիկոլը կարողանում է միայն մեկ բան՝ ղժղժալ եւ հայհոյել, մենք կարողանում ենք 100 բան՝ եւ հայհոյել իրեն, եւ այլ բաներ: Նա փորձելու է թունավորել, վարկաբեկել,պախարակել, ոչ մի բան չի օգնելու: Դա իր ագոնիան է, նա արդեն հոգի է տալիս քաղաքական տեսակետից: Մեզ պետք է ոչնչացնել մայր մեղուին, դրանից հետո հեշտ կլինի բուժել նրան հավատացող հասարակության այդ հատվածին»,-ասաց նա:
Աշոտյանը հավելեց, որ երբ ընտրությունների արդյունքում հաղթի ընդդիմությունը, անպայման պետք է ոչ միայն ստեղծվի պատերազմի հանգամանքներն ուսումնասիրող հետաքննչական լեգիտիմ ինստիտուտ, այլ պետք է ունենանք ճշմարտության հանձնաժողովի պես մի բան, որտեղ այդ մի քանի տարվա ընթացքում պետք է մաքրենք թարաբշտիկները, որոնք երեք տարվա մեջ տարբեր մարդկանց հոգիներում սերմանվել են:
Դիտարկմանը, որ գրեթե բոլոր ցուցակներում կան Նիկոլ Փաշինյանի նախկին կողմնակիցներ, Աշոտյանն ասաց, որ չպետք է առաջնորդվել 2018-ի տրամաբանությամբ, պետք է առաջ նայել: «Հայաստանում չկան քաղաքական տեսակետից ավելի մաքրված գործիչներ, քան ՀՀԿ-ի ժամանակին վարկաբեկվող, քաղաքական հալածանքների գործիչներն են՝ իմ անձից սկսած»:
