ՀԱՊԿ-ի ձգձգումը այդքան զարմանալի չի, ինչքան Հայաստանի իշխանությունների անգործությունը
ՔԱՂԱՔԱԿԱՆՈՒԹՅՈՒՆ
Երեկ, վաղ առավոտյան ՀՀ Գեղարքունիքի մարզի սահմանային հատվածում ՀՀ ԶՈՒ N զորամասի պահպանության տարածքում ադրբեջանական զինված ուժերի զինծառայողների կողմից շրջափակվել և գերեվարվել է ՀՀ ԶՈՒ վեց զինծառայող։ Նախօրեին էլ Նիկոլ Փաշինյանը ԱԺ ամբիոնից խոսեց ՄԱԿ-ի Անվտանգության խորհուրդ դիմելու հավանականության մասին։ Այս թեմայով զրուցել ենք իրավապաշտպան Լարիսա Ալավերդյանի հետ։ Հարցին, թե որքանո՞վ է այս իրավիճակը պայմանավորված վարչապետի պաշտոնակատարի երեկվա ելույթով իրավապաշտպանը պատասխանել է․ «Անկեղծ ասած, ես ուղղակի կերպով նման պատասխան տալ չեմ կարող, բայց այն բոլոր հայտարարությունները, որը անում է անօրինական կերպով այդ պաշտոնը զբաղեցնող անձը, գտնում եմ, որ սա հերթական մանիպուլյացիան է, հերթական ձգձգումն է, և դեպի Ադրբեջան շատ խնայողական վերաբերմունք ցուցադրելն է։ Ես չեմ հասկանում, թե ինչու, երբ որ սկզբից 200 ադրբեջանական զինծառայողներ ներխուժել են հայկական տարածքներ ինչո՞ւ նրանք չեն գերեվարվել և ինչո՞ւ են հասցրել նրան, որ հիմա գերեվարեն նորից 6 հոգի։ Պարզապես դա արդեն հստակ ձևավորված մի քաղաքականություն է, որը չի բխում Հայաստանի ազգային շահերից, այլ բխում է Ադրբեջանի և Թուրքիայի ազգային շահերից։ Այնպես որ այստեղ ես որևէ այլ բան ասել չեմ կարող»։
Հարցին, թե այս պահին Հայաստանն ինչ քայլեր կարող է անել և ՄԱԿ-ի անվտանգության խորհուրդ դիմելու դեպքում ինչ կարող ենք սպասել ՄԱԿ-ից Լարիսա Ալավերդյանը պատասխանել է․ «Այս դեպքում պետք է ասեմ, որ նախ և առաջ դա շատ ուշացած դիմում կլինի։ Եվ երկրորդը՝ արդյոք այս ձգձգումը այն գործի համար է, որ նրանք աշխատել են առանձին-առանձին լինի դա մշտական թե ժամանակավոր անդամների հետ, միայն այդ ժամանակ հասկանալի կլինի, թե մեր դիվանագիտական կորպուսը պետք է ստացած լիներ այնպիսի մի հանձնարարություն և զբաղվեր դրանով, որովհետև մտածել, որ հարցը մնալու է առանց մեր նախնական աշխատանքի առանց այդ պետությունների և անձանց հետ և այնտեղ մենք կունենանք հրաշալի որոշում, դա վերին աստիճանի միամտություն է։ Եվ դրա համար ես դա համարում եմ ուշացած և որոշ չափով անարդյունավետ միջոց»։
Ազգային ժողովում տարբեր պատգամավորներ իրենց դժգոհությունն են հայտնել Սյունիքում տեղի ունեցող իրադարձությունների հետ կապված ՀԱՊԿ-ի արձագանքից կամ դրա բացակայությունից, բայց այս կապակցությամբ ԱԺ նախագահը հայտարարեց, որ ինքը չի կարծում, թե ՀՀ դաշնակից երկրները չեն կատարում իրենց պարտականությունները, քանի որ ՀԱՊԿ-ը դեռ ունի ընթացակարգեր, մեխանիզմներ և ՌԴ-ի հետ երկխոսությունը շարունակվում է: Մյուս կողմից, կարծիքներ են հնչում, որ շատ արագ պետք է դիմել ՄԱԿ-ի Անվտանգության խորհուրդ: Անդրադառնալով այն հարցին, թե ո՞րն է այս հապաղման պատճառը և արդյոք ՀԱՊԿ-ը դեռ մեխանիզմներ ունի գործարկելու իրավապաշտպանը պատասխանել է․ «Նախ և առաջ ցանկացած մարմնին, այդ թվում նաև ՀԱՊԿ դիմելու համար պահանջվում է բավականին զգալի ժամանակահատված՝ լինի ՄԱԿ-ը կամ ՀԱՊԿ-ը։ Ես պետք է ասեմ, որ երկուսն էլ ուշացած են։ Այստեղ խնդիրներ կան, որոնք կուտակվել են նախքան այս դեպքերը։ Այս վերաբերմունքը, այս արհամարհանքը, որը արտահայտել է այս իշխանությունը ՀԱՊԿ-ի նկատմամբ, նախ և առաջ Յուրի Խաչատուրովի դեմ, որը ոչ միայն եղել է Խաչատուրովի այլ հենց ՀԱՊԿ-ի դեմ։ Եվ հետո, ես կարծում եմ, որ Հայաստանը նախորդ տարիների ընթացքում արդյունավետ համագործակցություն է ունեցել ՀԱՊԿ-ի հետ։ Մենք պետք է հստակեցնենք, որ, իհարկե, պետք է ակնկալենք այդ գործառույթները անցնելուց հետո ՀԱՊԿ-ը ի վերջո կպատասխանի։ Ես ծանոթ չեմ դիմումի բուն տեքստին, թե Հայաստանն ինչպես է դիմել ՀԱՊԿ և ինչ մեջբերում է արել, դա չափազանց կարևոր է։ Բայց այնուամենայնիվ այդ բոլոր գործողությունները ես համարում եմ ձգձգված։ Ես չգիտեմ, թե ինչու և ինչպես են գերեվարվել մեր 6 զինծառայողները, դա արդյոք նրա համար չի, որ ՀՀ իշխանությունները այդպես էլ չեն ձեռնարկում համապատասխան միջոցառումներ և միջոցներ, որ մեր սահմանը պաշտպանված լինի։ Այդտեղ, որտեղ գերեվարվել են ինչ է տեղի ունեցել հրաձգությո՞ն, մեր սահմանապահներն են կանգնա՞ծ եղել, ըստ էության, ո՛չ։ Ուղղակի նրանք երբ ուզում մտնում և դուրս են գալիս, անում են այն, ինչ ուզում են, երբ ուզում են և ինչպես ուզում են։ Եվ դրա համար ՀԱՊԿ-ի ձգձգումը այդքան զարմանալի չի, ինչքան Հայաստանի իշխանությունների անգործությունը»։
Սոնա Գիշյան
