Ռուսական կողմը մասնակցում է բանակցություններին. փոխնախարարը` գերեվարված վեց զինվորի մասին
ՔԱՂԱՔԱԿԱՆՈՒԹՅՈՒՆ
ՀՀ պաշտպանության փոխնախարար Արման Սարգսյանն այսօր Ազգային ժողովում, պատասխանելով լրագրողների հարցերին, ասաց, որ բանակցություններ են տարվում Գեղարքունիքի մարզից գերեվարված վեց զինծառայողներին վերադարձնելու համար։ Լրագրողների հարցին, թե արդյոք ռուսական կողմը նույնպես մասնակցում է բանակցություններին, Սարգսյանը պատասխանեց` այո։
«Բանակցություններ են վարվում, Ռուսաստանը` որպես մեր թիվ մեկ ռազմական գործընկեր, իհարկե իր մասնակցությունն ունի», – ասաց Սարգսյանը։
Նա վստահեցրեց, որ զինծառայողներին չկրակելու հրաման տրված չէ։
«Նման հրահանգ տրված լինել չի կարող», – ավելացրեց նա։
Նշենք, որ ՀՀ ՊՆ տարածած հաղորդագրության համաձայն` այսօր առավոտյան ՀՀ Գեղարքունիքի մարզի սահմանային հատվածում, ՀՀ ԶՈւ N զորամասի պահպանության տարածքում ինժեներական աշխատանքներ կատարելիս ադրբեջանական զինված ուժերի զինծառայողների կողմից շրջափակվել և գերեվարվել են ՀՀ ԶՈւ վեց զինծառայողներ։
Հիշեցնենք` ադրբեջանցի զինվորականները մայիսի 12-ից Հայաստանի Սյունիքի մարզում գտնվող Սև լճի տարածքում են և փորձում են ամրապնդվել այնտեղ։ Նմանատիպ իրավիճակ է նաև Գեղարքունիքի մարզի Կութ, Վերին Շորժա և Նորաբակ գյուղերի հատվածում։
Ռուսական կողմի միջնորդությամբ բանակցությունների մի քանի փուլ է կայացել։ Հակառակորդն առայժմ հեռանալու մտադրություն չունի։ Հայաստանը դիմել է ՀԱՊԿ-ին և ռազմական օգնություն խնդրել Ռուսաստանից։
Ռազմաքաղաքական ղեկավարությունը հայտարարում է, որ ցանկանում է խնդիրը լուծել խաղաղ ճանապարհով, բայց չի բացառում նաև ուժի կիրառման տարբերակը, եթե բանակցությունները արդյունք չտան։
