Անցյալ շաբաթ աշխարհում կորոնավիրուսով վարակման դեպքերը նվազել են 12, մահվան դեպքերը՝ 5%-ով. ԱՀԿ

Անցյալ շաբաթ աշխարհում գրանցվել է կորոնավիրուսային վարակի ավելի քան 4,8 միլիոն նոր դեպք և ավելի քան 85 հազար մահ: Նախորդ 7 օրվա համեմատ` վարակման դեպքերը նվազել են 12, մահվան դեպքերը՝ 5 տոկոսով:

Այս մասին հայտնել է Առողջապահության համաշխարհային կազմակերպությունը (ԱՀԿ):

«Գլոբալ առումով, անցած շաբաթվա ընթացքում, կորոնավիրուսի և մահվան նոր դեպքերը շարունակել են նվազել: Ընդհանուր առմամբ, վարակվել է ավելի քան 4,8 միլիոն մարդ և գրանցվել է 86 հազարից քիչ մահ, ինչը համապատասխանաբար 12 տոկոսով և 5 տոկոսով պակաս է նախորդ շաբաթվա համեմատ»,- ասվում է ԱՀԿ-ի համաճարակաբանական տեղեկագրում:

Մայիսի 10-ից 16-ն աշխարհում հայտնաբերվել է 4 809 520 վարակակիր, մահացել է 85 975 մարդ: Մայիսի 16-ի դրությամբ գրանցվել է, ընդհանուր առմամբ, 162 184 263 վարակման դեպք և 3 364 446 մահ:

Եվրոպայում 7 օրվա ընթացքում վարակվել է ավելի քան 684 հազար մարդ, մահացել է ավելի քան 16 հազարը: Շուրջ 1,2 միլիոն վարակման և ավելի քան 31 000 մահվան դեպք գրանցվել է Ամերիկայի երկրներում:

Հարավարևելյան Ասիայում բժիշկները հայտնաբերել են ավելի քան 2,5 միլիոն վարակակիր, 30 հազար մարդ մահացել է: Հնդկաստանում 1 շաբաթվա ընթացքում վարակվածների թիվն աճել է ավելի քան 2,3 միլիոնով:

Հնդկաստանին հաջորդում են Բրազիլիան (ավելի քան 437 հազար նոր դեպք), ԱՄՆ-ն (ավելի քան 235 հազար նոր դեպք), Արգենտինան (ավելի քան 151 հազար նոր դեպք), Կոլումբիան (ավելի քան 115 հազար նոր դեպք), Իրանը (ավելի քան 99 հազար նոր դեպք), Ֆրանսիան (ավելի քան 93 հազար նոր դեպք), Թուրքիան (ավելի քան 90 հազար նոր դեպք), Գերմանիան (ավելի քան 73 հազար նոր դեպք), Նեպալը (ավելի քան 61 հազար նոր դեպք), Ռուսաստանը (ավելի քան 59 հազար նոր դեպք) և Իտալիա (ավելի քան 50 հազար դեպք):