Հայաստանի հավաքականը լավ աշխատանք կատարեց. Կարլ Արնասոն
ՍՊՈՐՏ
Ֆուտբոլի Իսլանդիայի հավաքականի պաշտպան Կարլ Արնասոնը մեկնաբանել է 2022թ. ֆուտբոլի աշխարհի առաջնության ընտրական փուլի J խմբի երկրորդ տուրի խաղում Հայաստանի հավաքականից կրած պարտությունը 0:2 հաշվով: Իսլանդական «Ռեյկյավիկի» 38-ամյա ֆուտբոլիստը մեկնարկային կազմում ընդգրկվել էր այն բանից հետո, երբ Ռագնար Սիգուրդսոնը վնասվածք էր ստացել նախավարժանքի ժամանակ:
«Նման անսպասելի բաներ կարող են լինել, դուք պարզապես պետք է պատրաստ լինեք: Ստացվեց բարդ հանդիպում, չկարողացանք ստեղծել բավականաչափ գոլային պահեր: Այս խաղում նման չէինք մեզ: Բաց թողած գոլերի համար չեմ կարող մեղադրել որևէ մեկին: Պետք համախմբենք որպես թիմ ու շարժվենք առաջ:
Հիշեցնենք, որ Վազգեն Սարգսյանի անվան «Հանրապետական» ստադիոնում կայացած խաղում Հայաստանի հավաքականը 2 գոլերը խփել էր ընդմիջումից հետո և առաջին անգամ 2 հաղթանակով մեկնարկեց աշխարհի առաջնության ընտրական փուլերում: Խոակին Կապառոսի գլխավորած թիմը հաջորդ ընտրական հանդիպումը կանցկացնի մարտի 31-ին՝ Երևանում մրցելով Ռումինիայի հավաքականի հետ:
ԱԱ-2022-ի ընտրական փուլի J խմբի երկրորդ տուրից հետո Հայաստանի ու Գերմանիայի հավաքականներն ունեն 6-ական միավոր, Ռումինիան ու Հյուսիսային Մակեդոնիան՝ 3-ական, իսկ Իսլանդիան ու Լիխտենշտեյնը կրել են 2 պարտություն:
