ՀՀ կառավարության հետ չի քննարկվել ռուսական գազի մատակարարման երթուղու փոփոխությունը
ՏՆՏԵՍՈՒԹՅՈՒՆ
Օրեր առաջ համացանցում լուրեր էին շրջանառվում, որ ռուսական Газпром экспорт-ի և Ադրբեջանի պետական նավթային ընկերության (SOCAR) միջև 2021 թվականի մարտի 16-ին համաձայնագիր է կնքվել, ըստ որի՝ ռուսական գազը կարճ ժամանակով Հայաստան կմատակարարվի Ադրբեջանի տարածքով։ Այս մասին գրել են ռուսական մի շարք լրատվամիջոցներ՝ հղում անելով Газпром экспорт-ի տարածած հաղորդագրությանը։
Ռուսական գազը Ադրբեջանով Հայաստան կմատակարարվի «Հյուսիսային Կովկաս-Անդրկովկաս» գազատարի պլանային-կանխարգելման վերանորոգման աշխատանքների ընթացքում։
«Աշխատանքները կարող են տևել մոտ երեք շաբաթ։ Դրանց ավարտից հետո գազը կմատակարարվի նախկին երթուղով Ռուսաստանի Դաշնության և Վրաստանի սահմանով»,- ասվում է Газпром экспорт-ի հաղորդագրությունում։
Այս թեմայի վերաբորյալ 1or.am կայքը հարցում է ուղարկել փոխվարչապետ Մհեր Գրիգորյանի գրասենյակին` պարզելու համար, թե այդ որոշումը արդյոք քննարկվել է հայկական կողմի հետ, թե առանց Հայաստանի կարծիքը հարցնելու Ռուսաստանը և Ադրբեջանը պայմանավորվածություն են ձեռք բերել։ Հարցմանն ի պատասխան 1or.am կայքին տեղեկացրեցին, որ Հայաստանի Հանրապետություն բնական գազ մատակարարելու նպատակով Վրաստանի տարածքով ռուսական գազի փոխադրման երթուղու փոփոխության հարցը ՀՀ կառավարության հետ չի քննարկվել։ Հայաստան գազ մատակարարվել է և մատակարարվում է Վրաստանի տարածքում գտնվող Կարմիր կամուրջ տեղանքի գազի հաշվառման կառույցից։
Սոնա Գիշյան
