Ի՞նչ մեսիջներ էր տալիս Սերժ Սարգսյանը
ՎԵՐԼՈՒԾՈՒԹՅՈՒՆՆԵՐ
Նախօրեին դատարանի դիմաց հավաքվել էին ՀՀ երրորդ նախագահ Սերժ Սարգսյանի քաղաքական թիմակիցները, համախոհներն ու պարզապես մարդիկ, ովքեր աջակցում են նրան: Այդ օրը տեղի էր ունենում Սերժ Սարգսյանի գործով հերթական դատական նիստը: Պետք է արձանագրել, որ, այլ հավասար պայմաններում, ինչ-որ տեղ նաև անակնկալ կլիներ բազմահազար մարդկանց առկայությունը, սակայն վերջին տարիների ֆոնին ամեն բան նաև օրինաչափ էր: Գաղտնիք չէ, որ Հանրապետական կուսակցությունը հանդիսանում է արտախորհրդարանական ուժերից ամենամեծն ու ինստիտուցիոնալացվածը: Փաստ է նաև, որ եթե ՀՀԿ-ն 2018թ.-ի տոտալ էյֆորիայի պայմաններում հավաքեց շուրջ 5 տոկոս ձայն, ի դեպ, չար լեզուներն ասում են, որ ՀՀԿ-ն նույնիսկ հաղթահարել էր 5 տոկոսի շեմը, ապա առաջիկա ընտրություններում կասկածից վեր է, որ Հանրապետականը անհամեմատ ավելի շատ քվեներ կստանա: Քաղաքական բովանդակության մեջ դա օրինաչափ կլինի, քանի որ ՀՀԿ-ի շուրջ փչված բազմաթիվ փուչիկներ պայթեցին այս ժամանակահատվածում ու մարդիկ տեսան, որ իշխանությունների կողմից հրապարակ նետված տեղեկությունները շատ դեպքերում պարզապես կեղծիք էին: Ինչևէ, դատարանի դիմաց հավաքելով իր կողմնակիցներին բնականաբար Սերժ Սարգսյանը նպատակ ուներ մի ներսի և դրսի լսարաններին քանի հիմնական ուղերձներ հղելու:
Առաջինը թերևս այն էր, որ Սերժ Սարգսյանը ցանկանում էր քաղաքական դաշտի հիմնական դերակատարներին ցույց տալ, թե Հանրապետական կուսակցությունն ինչպիսի մեծ աջակցություն ունի, այլ կերպ ասած դա ուժի ցուցադրություն էր, հաշվի առնելով նաև այն հանգամանքը, որ այդտեղ չէին գտնվում մարզերում բնակվող հանրապետականները: Ուժի ցուցադրության գլխավոր նպատակներից մեկն էլ թերևս այն էր, որ երրորդ նախագահը հստակ ցույց տվեց, թե ընդդիմության հանրահավաքներին մասնակցողներից որքանն են եղել ՀՀԿ համակիրները: Այդ իմաստով հարկ է ընդգծել, որ մեսիջը պարզ էր՝ ապագա քաղաքական գործընթացներում առանց ՀՀԿ-ի քաղաքական ռեսուրսի ընդդիմությունը դժվարություններ է ունենալու: Այսինքն ՀՀԿ-ն յուրատեսակ լոկոմոտիվի դեր է խաղացել հանրահավաքներ գեներացնելու և օրակարգ թելադրելու առումով:
Երկրորդ մեսիջը, որն արտացոլվեց Սերժ Սարգսյանի ելույթում, այն էր, որ երրորդ նախագահը և իր թիմն ամենևին չեն հաշտվել պատերազմից հետո, ինչպես նաև եռակողմ հայտարարության արդյունքում առաջ եկած իրողությունների հետ: Սերժ Սարգսյանն արձանագրեց մի կոնցեպ, ըստ որի նա չի համարում, որ Արցախի հարցը լուծված է և եռակողմ հայտարարության մեջ արտացոլված բազմաթիվ դրվագներով խնդրահարույց հարցեր կան, որոնք շտկման անհրաժեշտություն ունեն: Ի դեպ, բավականին թափանցիկ այս մասին ակնարկել էր նաև երկրորդ նախագահ Ռոբերտ Քոչարյանը: Նկատենք, որ նախկին նախագահներից զատ որևէ այլ ուժ, այդ թվում իշխանությունը, այս թեմայով որևէ հստակ դիրքորոշում չի արտահայտել: Արցախի կարգավիճակի, Ադրբեջանի կազմում երբևէ չլինելու և Հայաստանի անվտանգային համակարգի շուրջ ձևավորված օղակի մասին խոսելիս՝ Սերժ Սարգսյանը նաև մեսիջներ էր տալիս աշխարհաքաղաքական կենտրոններին, որ իր թիմի իշխանության գալուց հետո, Արցախի հարցի հայանպաստ լուծումը լինելու է Հայաստանի արտաքին քաղաքական գերակայություններից մեկը: Եվ վերջապես երրորդը, ինչ ուզում էր ասել Սերժ Սարգսյանը: Նա աշխարհաքաղաքական կենտրոններին ուղերձ էր տալիս այն մասին, որ Հայաստանում, ի դեմ իրեն, ոչ բոլոր ուժերն են հաշտվել ստեղծված իրավիճակի հետ, ու պատրաստ են քիրվայություն անեն թշնամու հետ՝ ի վնաս Հայաստանի Հանրապետության:
Կարեն Դանիելյան
