Մեկ օրվա ընթացքում Երկրի վրա տեղի է ունեցել մոտ 150 երկրաշարժ
ՀԱՍԱՐԱԿՈՒԹՅՈՒՆ
Հինգշաբթի` մարտի 4-ին գրեթե 150 երկրաշարժ է տեղի ունեցել մոլորակի ամբողջ տարածքում: Դրանցից ամենաուժեղը՝ 7,3-ից 8,1 մագնիտուդ ուժգնությամբ, գրանցվել է Նոր Զելանդիայի ափերի մոտ, հայտարարվել է ցունամիի վտանգ: Այս մասին գրում է korrespondent.net կայքը:
ԱՄՆ երկրաբանական ծառայության տվյալների համաձայն՝ տարբեր ուժգնության ցնցումներ են զգացվել Իսպանիայում, Չինաստանում, Ճապոնիայում, Հունաստանում, Արևմտյան Թուրքիայում, Իսլանդիայում, Նիկարագուայում, Նոր Զելանդիայում և այլ երկրներում:
Այս կապակցությամբ Պերուի, Չիլիի, Ֆրանսիայի, Ավստրալիայի և Նոր Զելանդիայի իշխանությունները ցունամիի սպառնալիքի պատճառով ափամերձ տարածքում բնակվող քաղաքացիներին կոչ են արել տարհանվել:
Միևնույն ժամանակ, ըստ ԶԼՄ-ների հաղորդագրությունների, ամերիկացի սեյսմոլոգներն արդեն հայտնել են առաջին ցունամիի մասին. 0,03 մ բարձրությամբ ալիքներ են գրանցվել խաղաղօվկիանոսյան Տոնգա Թագավորության մայրաքաղաք Նուկուալոֆայի շրջանում:
Այս ցունամին առաջացել է Խաղաղ օվկիանոսում գրանցված 8,1 մագնիտուդ ուժգնությամբ երկրաշարժից հետո: Նորզելանդական մի շարք այլ պետությունների համար հայտարարվել է 1-ից 3 մետր բարձրությամբ ալիքների սպառնալիք:
