«Իշխանությունը փորձում է գոյատևել. այդ գոյության ամեն օրը մեր պետության վրա առնվազն մեկ ամսվա կորուստ է արժենում». «Փաստ»

ՄԱՄՈՒԼԻ ՏԵՍՈՒԹՅՈՒՆ 23 Փետրվար, 2021 8:41

«Փաստ» օրաթերթը գրում է

Փետրվարի 20-ին տեղի ունեցավ ընդդիմության հանրահավաքը: Ի թիվս այլ հարցերի, քննարկման կիզակետում կրկին մարդկանց քանակն էր: Իրականում հասարակությունը միլիոնով, թե, օրինակ՝ 20-30 հազարով դուրս կգա փողոց, ըստ քաղաքագետ Աղասի Ենոքյանի, ավելի շուտ տեխնիկական հարց է:

«Այն, որ հասարակությունը դժգոհ է իշխանություններից, ակնհայտ փաստ է: Հաշվի առնելով, թե քանի հոգի է փողոց դուրս գալիս, շատերն այդպես փորձում են գնահատել, թե քանի հոգի է դժգոհ իշխանություններից: Իհարկե, դա սխալ է, որովհետև շատերը դժգոհ են, բայց փողոց դուրս չեն գալիս տարբեր պատճառներով: Մի մասը դեպրեսիայի մեջ է, մի մասը պատերազմի հետևանքով դեռևս լուրջ ողբերգության մեջ է, մի մասը հիասթափված է թե՛ Նիկոլ Փաշինյանից, թե՛ միտինգավորներից:

Մի մասն էլ պարզապես մրսում է: Այնպես որ, սա իսկապես քաղաքական առումով էական չէ, բայց տեխնիկապես էական է: Այն առումով է էական, որ եթե մեծ թվով միտինգավորներ են լինում, ապա ոստիկանությունն ու անվտանգության մյուս ծառայությունները պարզապես չեն կարողանում ճնշել այդքան մեծ զանգվածների բողոքը»,«Փաստի» հետ զրույցում ասաց Ա. Ենոքյանը: Անդրադառնալով վերջին օրերին իշխանության իրականացրած գործողություններին՝ կապված նաև մի շարք ձերբակալությունների, կալանավորումների հետ՝ Աղասի Ենոքյանը մի քանի պատճառ մատնանշեց:

«Պատճառներից մեկը կարող է լինել այն, որ, հանրության մեջ հայտնի մարդկանց ձերբակալելով՝ փորձում են ընդհանրապես վախեցնել հասարակությանը, ճնշել բողոքի ցանկացած քայլ, ճնշել ազատ մտքի, ազատ խոսքի արտահայտություն: Երկրորդ՝ պարզապես փորձում են հասարակությունից մեկուսացնել այն մարդկանց, որոնց խոսքը կարևոր է հասարակության համար:Իշխանություններին թվում է, որ եթե այդ փոքր աղբյուրը, այդ կաթիլը պակասի, իրենց իշխանությունն ավելի է ամրանում դրանով: Եվ, ի վերջո, ես այս ամենի մեջ մի շատ վատ միտում եմ տեսնում: Այս ամեն ինչով պարզապես փորձում են նսեմացնել, վարկաբեկել Ազգային անվտանգության ծառայությանը, որ դրանից հետո այլևս որևէ մեկը որևէ հարցով չվստահի այդ ծառայությանը»,-նկատեց մեր զրուցակիցը: Աղասի Ենոքյանի խոսքով, իշխանության նման քայլերը մեկ տեղ են տանում. «Սա պարզապես տանում է դիկտատուրայի, նաև նրան, որ մարդիկ իրենց միտքն արտահայտելու իրավունք չունենան, երբ մի անհեթեթ պատճառով, օրինակ՝ մի ֆեյքի հետ կապելով՝ կարող են բազմաթիվ մարդկանց ձերբակալել»: Ըստ քաղաքագետի, այս ամենը վտանգավոր է նաև այլ՝ ավելի կարևոր խնդրի տեսանկյունից:

«Տեսեք, մենք արդեն մոռացել ենք Արցախը, մենք մոռացել ենք կորուսյալ 10 հազար կիլոմետրը, մենք մոռացել ենք 5000 զոհված տղաներին, և հիմա արդեն սկսում ենք խոսել Սյունիքը պահելու մասին: Խնդիրն այն է, որ արդեն Սյունիքի հարցն էլ ենք մոռանում, խոսում ենք այն մասին, թե քանի մարդ էր եկել հանրահավաքին՝ մոռանալով, թե հանրահավաքի խնդիրը որն էր: Ի վերջո, խոսում ենք այն մասին, թե քանի հոգի են ձերբակալել՝ 3, 4… Այստեղ իսկապես օրակարգ շեղելու խնդիր կա: Թեև հասարակությանը շեղելու կարևոր խնդիր կա, բայց ես կարծում եմ, որ կազմակերպված ընդդիմությունն այս հարցերով չպետք է շեղվի: Պետք է իր օրակարգը դնի ու հենց այդ օրակարգն առաջ տանի: Նման շեղումներն ընդդիմությանը չպետք է դուրս հանեն իր հիմնական ճանապարհից»,-հավելեց նա:

Իսկ թե որը պետք է լինի այդ հիմնական ճանապարհն ու օրակարգը, քաղաքագետը նշեց. «Այս պահին հիմնական խնդիրը Նիկոլ Փաշինյանի հրաժարականն է, որովհետև մնացած ամեն ինչը՝ թե՛ հանրային այս բարոյահոգեբանական մթնոլորտի վերականգնումը, թե՛ տնտեսության վերափոխումը, թե՛ անվտանգության հարցերը, թե՛ բանակի վերականգնումն ու անգամ գերիների հարցը միայն դրանից հետո կարելի է դնել: Ինչո՞ւ. որովհետև տեսնում ենք, որ Նիկոլ Փաշինյանի օրոք այս հարցերը չեն լուծվելու, այս հարցերը նրա համար պարզապես էական չեն: Նիկոլ Փաշինյանի համար հիմա էականը իշխանությունն օր ավելի պահելն է: Իշխանության նպատակը, մեծ հաշվով, մեկն է՝ հնարավորինս երկար մնալ աթոռներին, որովհետև բոլորի համար էլ ակնհայտ է, որ եթե Ն. Փաշինյանն իշխանության չլինի, բանտախցում է հայտնվելու:

Եվ այս առումով մեկ օր ավելի իշխանության մնալու ցանկությունը բնական է: Իսկ այն, որ կառավարության նիստում դրամարկղային կտրոններ են հաշվում, Ազգային ժողովի նիստում անհեթեթ օրենքներ են քննարկում, իրականում այդ ամենը պարզապես գործունեության իմիտացիայի և ժամանակ երկարացնելու նպատակ ունի. իշխանության հիմնական խնդիրը մեկ օր ավելի իշխանության մնալն է: Այս իշխանությունը ոչ միայն գլոբալ, այլև անգամ մարտավարական որևէ խնդիր չի դնում»:

Միևնույն ժամանակ, քաղաքագետը չի կարծում, թե իրականությունից կտրված լինելու խնդիր կա: «Շատ լավ հասկանում են իրականությունը և հասկանում են, որ անելիք չունեն այս իրականության մեջ և այս երկրում: Պարզապես փորձում են իրենց գոյատևելը երկարացնել: Ես չեմ վախենա ասել, որ այս ցանկությունը պետությանը կործանման է տանում. մենք, փաստորեն, տապալել ենք անվտանգության պարզագույն խնդիրները, տապալել ենք տնտեսական պարզագույն խնդիրները, և որևէ խնդիր ու օրակարգ չկա: Իշխանությունը փորձում է գոյատևել, ու իր գոյության ամեն օրը մեր պետության վրա առնվազն մեկ ամսվա կորուստ է արժենում»,-եզրափակեց քաղաքագետը: